Avropa Komissiyası Ukrayna və Moldova ilə üzvlük danışıqlarının aparılmasına dair sənədlər hazırlayıb
Avropa Komissiyası Ukrayna və Moldova ilə üzvlük danışıqlarının aparılmasına dair sənədlər hazırlayıb.
InterPress.ge xəbər verir ki, bu barədə Avropa Komissiyası bəyanat yayıb.
Bəyanatda qeyd olunur ki, martın 12-də Avropa Komissiyası Ukrayna və Moldovanın üzvlüyünə dair danışıqların aparılması üçün rəhbər prinsipləri özündə əks etdirən danışıqlar çərçivəsi layihəsinə dair sənədləri rəsmi olaraq Avropa Şurasına təqdim edib.
Ukrayna və Moldova üçün danışıqlar çərçivələrinin layihəsi əvvəlki genişlənmələrin və davam edən üzvlük danışıqlarının təcrübəsinə əsaslanır və “yenidən işlənmiş genişlənmə metodologiyasını birləşdirir və Aİ qanunvericiliyinin inkişafını nəzərə alır”.
Hər iki ölkə üçün qeyd olunan sənədlər üç hissədən ibarətdir: 1) üzvlük danışıqlarını tənzimləyən prinsiplər; 2) danışıqların məzmunu; 3) danışıqlar proseduru.
Bəyanata görə, Avropa Şurası indi layihələrin daxili baxışına başlamalı və onları təsdiq etməlidir.
Bundan sonra Avropa Şurasına sədrlik edən ölkə ilk hökumətlərarası konfransda Aİ-nin razılaşdırılmış ümumi mövqeyini hər bir ölkəyə təqdim edəcək və bu, üzvlük danışıqlarının formal başlanğıcı olacaq.
