Keçmiş hökumət başçısı yaralandı - İntihar maddəsi ilə istintaq başlanıb

Sagarecoda yerləşən “Geohospitals” klinikasına Acara hökumətinin keçmiş sədri Tornike Rijvadzə yerləşdirilib. Onun sinə nahiyəsində odlu silahdan atəş nəticəsində yaranmış yara aşkarlanıb.

InterPress.ge xəbər verir ki, bu barədə Gürcüstan Daxili İşlər Nazirliyi məlumat yayıb.

Nazirliyin məlumatında qeyd olunur ki, Rijvadzəyə təcili tibbi yardım göstərilib. Həkimlərin açıqlamasına görə, onun ağciyəri zədələnib və vəziyyəti sabit ağır olaraq qiymətləndirilir.

Hadisə ilə bağlı Daxili İşlər Nazirliyi Gürcüstan Cinayət Məcəlləsinin 115-ci maddəsi ilə – intihara qədər çatdırma faktı üzrə istintaq başladıb.

“7 iyulda Sagarecoda yerləşən "Geohospitals“ klinikasına sinə nahiyəsində odlu silahdan atəş nəticəsində yaranmış yara ilə Tornike Rijvadzə yerləşdirilib. Faktla bağlı Gürcüstan Cinayət Məcəlləsinin 115-ci maddəsi ilə istintaq aparılır, bu maddə intihara qədər çatdırmanı nəzərdə tutur. Hadisə ilə bağlı intensiv istintaq hərəkətləri davam edir.

Tornike Rijvadzəyə təcili tibbi yardım göstərilib. Həkimlərin izahına görə, onun ağciyəri zədələnib və vəziyyəti sabit ağırdır.

Həmçinin, odlu silahın səhlənkar saxlanılmasına görə Gürcüstan Cinayət Məcəlləsinin 238-ci maddəsi ilə bir nəfər təqsirləndirilən şəxs qismində saxlanılıb,” – deyə Daxili İşlər Nazirliyinin yaydığı məlumatda qeyd olunur.