Gürcüstanda yol qəzası qurbanlarının sayı artıb
“Gürcüstan Təhlükəsiz Yollar Alyansı” yol qəzası qurbanlarının xatirəsinə həsr olunmuş Beynəlxalq Anım Günü münasibətilə məlumat yayıb.
InterPress.ge xəbər verir ki, qurumun açıqlamasına görə, 2025-ci ilin yanvar-sentyabr aylarında Gürcüstanda 345 nəfər həlak olub, 6 mindən çox insan xəsarət alıb. Bu, ötən ilin eyni dövrü ilə müqayisədə 14 faiz artım deməkdir.
Təşkilatın məlumatında bildirilir ki, 2025-ci ilin ilk doqquz ayında ölkədə 4 480 yol-nəqliyyat hadisəsi baş verib, bu isə ötən ilin göstəricisindən 9 faiz çoxdur. Həlak olanların sayı 14,6%, yaralıların sayı isə 11,8% artıb.
“Mövcud statistika aydın göstərir ki, yol təhlükəsizliyi sahəsində Gürcüstanın mövcud yanaşmaları yenidən nəzərdən keçirilməlidir. Ölkə BMT-nin 2021–2030-cu illər üçün Yol Təhlükəsizliyi üzrə Fəaliyyət Dekadasına qoşulub və 2030-cu ilə qədər yol qəzalarında ölən və yaralananların sayını 50% azaltmaq öhdəliyi götürüb,” – deyə təşkilatın sədri Eka Laliashvili bildirib.
Laliashvili qeyd edib ki, statistika hökumət üçün aydın xəbərdarlıq siqnalıdır və təhlükəsizliyi artırmaq üçün sürətə nəzarət və maarifləndirmə tədbirləri dərhal gücləndirilməlidir.
O, bir sıra təcili addımların vacibliyini vurğulayıb:
• sürət üçün icazə verilən tolerant həddin (15 km/saat) azaldılması;
• şəhər yollarında sürət limitlərinin yenidən nəzərdən keçirilməsi;
• sürət həddini aşan sürücülər üçün kameralar vasitəsilə cərimə və bal azaldılması mexanizminin tətbiqi;
• arxa oturacaqlarda təhlükəsizlik kəmərinin məcburi istifadəsinin tətbiqi;
• uşaqlar üçün avtokresloların məcburi istifadəsi, təhlükəsiz məktəb zonalarının və piyada keçidlərinin yaradılması.
“Yol təhlükəsizliyi sahəsində əsas elementlərdən biri ictimai maarifləndirmə və davamlı kommunikasiya olmalıdır. Beynəlxalq təcrübə göstərir ki, ‘təhlükəsiz sistem’ yanaşması ən təsirli modeldir və bu sistem sayəsində bir çox ölkə qəzalarda insan tələfatını əhəmiyyətli dərəcədə azalda bilib. Hər bir həyat önəmlidir və bu sahədə vaxt həlledici faktordur,” – deyə Laliashvili vurğulayıb.
Qeyd edək ki, BMT-nin Baş Assambleyası və Ümumdünya Səhiyyə Təşkilatının dəstəyi ilə 2005-ci ildə noyabrın üçüncü həftəsi “Yollarda həlak olanların xatirəsinə həsr olunmuş Beynəlxalq Gün” kimi elan olunub. Bu gün yol qəzası qurbanlarının və ağır yaralananların xatirəsinə həsr olunub və əsas məqsədi yol təhlükəsizliyinin vacibliyini ictimaiyyətə xatırlatmaqdır.
Bu il beynəlxalq anım gününün devizi:
👉 “Xatırla. Qoru. Hərəkət et.”
Bu şüar, yollarda itirilmiş insanları xatırlamağa, sağ qalanları qorumağa və yeni faciələrin qarşısını almaq üçün hərəkətə keçməyə çağırır.
