Məktəblərin yaxınlığındakı qida obyektlərində yoxlamalar aparılır

Uşaqların sağlamlığının qorunması və onların təhlükəsiz qida ilə təmin edilməsi məqsədilə Qida Təhlükəsizliyi Milli Agentliyi məktəblərin yaxınlığında fəaliyyət göstərən iaşə obyektlərində yoxlamalar aparır.

InterPress.ge xəbər verir ki, bu barədə qurumun yaydığı məlumatda bildirilir.

Agentliyin məlumatına görə, dövlət nəzarəti həm çörəkbişirmə müəssisələrində, həm də məktəblilərin tez-tez müraciət etdiyi yaxınlıqdakı marketlərdə həyata keçirilir. İnspektorlar obyektlərdə sanitar-gigiyena vəziyyətini, qidanın saxlanma və satış şəraitini, istifadə müddətlərini və qida təhlükəsizliyinə dair digər tələblərə əməl olunmasını yoxlayırlar.

Bununla yanaşı, məktəb və məktəbəqədər müəssisələrin yeməkxanaları fasiləsiz şəkildə nəzarətdə saxlanılır. Bu il ərzində 6000-dən çox dövlət yoxlaması aparıldığı, 173 qanun pozuntusunun aşkarlandığı qeyd olunur. Aşkarlanan hallar arasında daha çox istifadə müddəti bitmiş məhsulların satışı, etiketləmə qaydalarının pozulması və qeydiyyatsız fəaliyyət faktları üstünlük təşkil edib.

Agentlik vətəndaşlara müraciət edərək, şübhəli qida məhsulları və ya hər hansı pozuntu müşahidə etdikdə, məlumatı Ətraf Mühitin Mühafizəsi və Kənd Təsərrüfatı Nazirliyinin “1501” qaynar xəttinə bildirməyi xatırladıb.

Qurum bildirir ki, istehlak bazarının birgə monitorinqi və əhalinin aktiv iştirakı qida təhlükəsizliyi ilə bağlı uyğunsuzluqların vaxtında aşkar olunmasına və aradan qaldırılmasına imkan verəcək.