Gürcüstan sərhədini qanunsuz keçməkdə ittiham olunan iki rusiyalı saxlanılıb

Gürcüstan Daxili İşlər Nazirliyinin məlumatına görə, ölkənin dövlət sərhədini qanunsuz və qrup halında keçmək ittihamı ilə Rusiya Federasiyasının iki vətəndaşı – Vladimir Dubovski və Alina Savelyeva saxlanılıblar.

InterPress.ge xəbər verir ki, bu barədə Gürcüstan Daxili İşlər Nazirliyi məlumat verib. 

Nazirliyin açıqlamasında bildirilir ki, saxlanılan şəxslər sərhəd nəzarətindən yan keçməklə Gürcüstana qanunsuz daxil olublar və son üç il ərzində ölkədə qeyri-qanuni şəkildə yaşayırdılar.

DİN-in məlumatına görə, Sərhəd Polisi hazırda son illərdə Gürcüstan ərazisinə digər ölkə vətəndaşlarının qeyri-qanuni şəkildə miqrasiyası ilə bağlı onlarla cinayət işi üzrə araşdırmanı davam etdirir. Nazirlik cinayətkar miqrasiyaya qarşı mübarizəni prioritet elan edib və bu istiqamətdə operativ-axtarış və istintaq tədbirləri həyata keçirilir.

Məlumatda qeyd olunur ki, Dubovski və Savelyeva dəfələrlə DİN-in Miqrasiya Departamentinə sığınacaq üçün müraciət ediblər, lakin onlar kriteriyalara uyğun gəlmədikləri üçün müraciətləri rədd edilib. Bu qərar onların şikayəti əsasında iki instansiya məhkəməsi tərəfindən də qüvvədə saxlanılıb.

Bu ilin 12 noyabrında, məhkəmənin qərarı ilə hər iki şəxs barəsində həbs qətimkan tədbiri seçilib və onlar hüquq-mühafizə orqanları tərəfindən saxlanılıb.

Hazırda hər iki şəxs təcridxanaya yerləşdirilib.

Faktla bağlı araşdırma Cinayət Məcəlləsinin 344-cü maddəsinin 2-ci hissəsi ilə aparılır.