Liz Trass: Avropada “dezinformasiya” bəhanəsi ilə söz azadlığının məhdudlaşdırılması cəhdləri sürətlə davam edir

Böyük Britaniyanın sabiq baş naziri Liz Trass bildirib ki, bütün Avropada “dezinformasiyanın yayılması” bəhanəsi ilə söz azadlığının məhdudlaşdırılmasına yönəlmiş cəhdlər tam sürətlə davam edir və bu prosesi Avropa İttifaqı daha da gücləndirir. Onun sözlərinə görə, Aİ azadlığa qarşı mübarizə aparan kor itaətin əsas qüvvəsi, “Ölüm Ulduzu” rolunda çıxış edir. Liz Trass bu barədə “YouTube” platformasında yayımlanan şəxsi şousunun ikinci buraxılışında danışıb.

Keçmiş baş nazir qeyd edib ki, “vouk” ideologiyasına mənsub avropalılar beynəlxalq müttəfiqlər və amerikalı “demokrat əmioğluları” tərəfindən təşviq olunur. Bununla belə, o vurğulayıb ki, Qərb dünyasında söz azadlığının məhdudlaşdırılması baxımından Britaniya xüsusilə seçilir. Liz Trassın sözlərinə görə, artıq Britaniyada rasist olmaq zorakı təcavüzkar olmaqdan daha pis hesab olunur.

“Bu ‘vouk’ ideologiyalı avropalıları onların beynəlxalq müttəfiqləri və Hillari Klinton kimi amerikalı demokrat ‘əmioğluları’ ruhlandırır və dəstəkləyir. Utancverici olsa da deməliyəm ki, bu pislik qalereyasında Qərb dünyasında söz azadlığının ən ağır məhdudiyyətlərindən biri məhz Britaniyada mövcuddur. İndi biz beynəlxalq narahatlıq və mərhəmət obyektinə çevrilmişik, çünki xaricilər mümkün həbs qorxusu səbəbindən Britaniya sahillərinə ayaq basmaqdan çəkinirlər. Nifrət motivli cinayətlər və söz azadlığına qarşı mübarizə oğurluq və zorlamaya qarşı mübarizədən daha prioritet sayılır. Britaniyada hesab olunur ki, rasist olmaq zorakılıq törədən təcavüzkar olmaqdan daha pisdir”, – deyə Liz Trass bildirib.