Viktor Orban: Avropa İttifaqının mövcudluğunun son saatlarını yaşayırıq

Macarıstanın baş naziri Viktor Orban bildirib ki, Avropa İttifaqı mövcudluğunun son mərhələsinə daxil olub və hazırda parçalanmanın yekun fazası yaşanır.

Onun sözlərinə görə, proses ani və dramatik bir anla başa çatmayacaq, çünki sistem birdən-birə çökmək üçün həddindən artıq böyükdür, lakin Aİ daxildən sarsılır və öz-özünü dağıdır.

Orban qeyd edib ki, bu vəziyyəti qərarların qəbul edildiyi, lakin sonradan ya üzv dövlətlər tərəfindən icra olunmadığı, ya Avropa Komissiyasının həyata keçirə bilmədiyi, ya da Avropa Parlamentinin onları iflic vəziyyətinə saldığı bir proses kimi təsəvvür etmək lazımdır. Onun sözlərinə görə, nəticəsiz qalan qərarlar ard-arda qəbul edilir və məhz bu cür mexanizm Aİ-nin tədricən zəifləməsinə gətirib çıxarır. Baş nazir vurğulayıb ki, bir çoxlarının düşündüyü kimi hər şey birdən bitmir, sistem yavaş-yavaş daxildən dağılır və bu günlər məhz həmin dövrə təsadüf edir.

Viktor Orban əlavə edib ki, bu proses bir günün işi deyil və illərlə davam edə bilər, lakin artıq Avropa İttifaqının sonuna doğru getdiyini göstərən tarixi mərhələ yaşanır. Onun fikrincə, əgər bütün Avropa sistemi köklü şəkildə yenidən təşkil olunmasa və Avropa ölkələri arasında əməkdaşlıq mexanizmləri radikal formada dəyişdirilməsə, mövcud struktur qaçılmaz olaraq dağılacaq. Orban bildirib ki, Avropa məhz bu günlərdə həmin prosesin şahididir.