Distribütorlar Assosiasiyası: Ərzaq məhsullarında real marja baş nazirin açıqladığının yarısı qədərdir
Distribütorların Biznes Assosiasiyasının rəhbəri Laşa Rijamadze baş nazir İrakli Kobaxidzenin ərzaq məhsullarında yüksək qiymət artımı ilə bağlı səsləndirdiyi fikirlərə münasibət bildirib.
InterPress.ge xəbər verir ki, Rijamadze “BusinessPressNews”ə açıqlamasında qeyd edib ki, konkret olaraq bəhs edilən məhsul kateqoriyalarında marja real olaraq baş nazirin açıqladığı göstəricilərin təxminən yarısı qədərdir.
Xatırladaq ki, İrakli Kobaxidze Avropa ölkələri ilə Gürcüstandakı qiymətlər arasında ciddi fərqin mövcud olduğunu və bunun əsas səbəbinin distribütor şirkətləri ilə market şəbəkələrinin yüksək qiymət artımı olduğunu bildirib. Baş nazirin sözlərinə görə, Gürcüstanla Fransa bazarları müqayisə edildikdə, eyni beynəlxalq brendlərin məhsulları Gürcüstanda günəbaxan yağında 34 faiz, makaronlarda 97 faiz, düyüdə 180 faiz, kərə yağında 30 faiz, pendirdə 42 faiz, şokoladda isə 47 faiz daha bahadır. Onun açıqlamasına əsasən, məhsulun sərhəddən satış rəfinədək orta qiymət artımı 86 faiz təşkil edir. Baş nazir bu məsələnin araşdırılması üçün hüquq-mühafizə orqanlarına müraciət edib, həmçinin parlamentdə istintaq komissiyasının yaradılmasını təklif edib.
Laşa Rijamadzenin sözlərinə görə, assosiasiya illərdir ki, qiymət artımına səbəb olan problemlər barədə danışsa da, bu məsələlər indiyədək real nəticə verməyib. O bildirib ki, yerli istehsalçılar və distribütorlar yüksək qiymət artımına məhz market şəbəkələrinin tətbiq etdiyi müxtəlif tələblər səbəbindən məcbur qalırlar. Bunlara mağazaya giriş haqqı, “keşbek” adlanan ödənişlər və digər şərtlər daxildir.
Rijamadze qeyd edib ki, qiymətlərin formalaşmasına təkcə market şəbəkələrinin tələbləri deyil, eyni zamanda müxtəlif dövlət tənzimləmələri də təsir göstərir. O, xüsusilə Tbilisi meriyası tərəfindən iriölçülü nəqliyyat vasitələrinə tətbiq edilən məhdudiyyətləri misal çəkərək bildirib ki, bu kimi qərarlar distribütorlar və istehsalçılar üçün əlavə xərclər yaradır və nəticədə bu xərclər məhsul qiymətlərinə əks olunur. Onun sözlərinə görə, bəzi hallarda bu cür tənzimləmələr ayrı-ayrı şirkətlər üçün milyonlarla lari əlavə xərc formalaşdıra bilər və bu da birbaşa istehlakçıya zərər vurur.
Assosiasiya rəhbəri vurğulayıb ki, baş nazirin açıqlamasında səsləndirilən yüksək marja göstəriciləri bu tip ərzaq məhsulları üçün real deyil. Onun sözlərinə görə, distribütor şirkətlərin böyük əksəriyyəti məhz bu kateqoriyalı məhsullarda ən aşağı marja ilə işləyir və bəhs edilən səviyyədə qazanc fiziki olaraq mümkün deyil. Rijamadze bildirib ki, açıqlanan rəqəmlər təxminən iki dəfə azaldılarsa, real vəziyyətə daha yaxın göstərici əldə etmək olar.
