Xüsusilə külli miqdarda narkotiklərin qanunsuz dövriyyəsi ilə bağlı 3 nəfər saxlanılıb
Gürcüstan Daxili İşlər Nazirliyi böyük və xüsusilə külli miqdarda narkotik vasitələrin qanunsuz əldə edilməsi, saxlanılması və satışına köməklik göstərilməsi ittihamı ilə üç nəfərin saxlanıldığını açıqlayıb.
InterPress.ge xəbər verir ki, bu barədə Gürcüstan Daxili İşlər Nazirliyi məlumat verib.
Nazirliyin yaydığı məlumata görə, Tbilisi Polis Departamentinin Vake–Saburtalo, İsani–Samqori və Qldani–Nadzaladevi baş idarələrinin əməkdaşları tərəfindən 2002-ci il təvəllüdlü G.Ç., 2007-ci il təvəllüdlü L.K. və 1985-ci il təvəllüdlü, xarici ölkə vətəndaşı N.H. saxlanılıb.
Aparılan şəxsi axtarışlar və saxlanılan şəxslərin göstərdiyi ünvanlar üzrə keçirilən əməliyyat-istintaq tədbirləri nəticəsində xüsusilə külli miqdarda narkotik maddələr maddi sübut kimi götürülüb. Aşkarlanan narkotiklər arasında alfa-PVP, metadon, metamfetamin, mefedron və marixuana olduğu bildirilir.
Faktla bağlı istintaq Gürcüstan Cinayət Məcəlləsinin 260-cı və 260-cı prima maddələri ilə aparılır. Sözügedən maddələr 20 ilədək və ya ömürlük azadlıqdan məhrumetmə cəzasını nəzərdə tutur. İstintaq tədbirləri davam etdirilir.
