Çexiya parlamentinin spikeri Ukraynaya silah tədarükünə qarşı çıxıb – UNN

Çexiya parlamentinin spikeri Tomio Okamura Yeni il müraciətində Ukraynaya silah tədarükünə qarşı mövqeyini bir daha ifadə edib. Bu barədə Ukraynanın UNN nəşri Çexiyanın České noviny agentliyinə istinadən məlumat yayıb.

Spiker bildirib ki, silahların “tamamilə mənasız bir müharibəni dəstəkləmək” üçün göndərilməsi yolverilməzdir. Onun sözlərinə görə, bu prosesdə pullar müxtəlif istiqamətlərə axır və bu “biznesdən” Qərb şirkətləri, hökumətlər, eləcə də Ukrayna prezidenti Volodymyr Zelensky ətrafında olan korrupsioner dairələr faydalanır.

Tomio Okamura çıxışında qeyd edib ki, “qoy oğurlasınlar, amma Çexiya Respublikasından yox” və belə yanaşmaya malik ölkələrin Avropa İttifaqında yer almamalı olduğunu vurğulayıb. O, həmçinin əlavə edib ki, Çexiya hökuməti çex pensiyaçıların, əlilliyi olan şəxslərin və uşaqlı ailələrin vəsaiti hesabına silah alaraq onu “tamamilə mənasız bir müharibəyə” göndərə bilməz və vətəndaşların pullarının yalnız müharibəni dəstəkləyən təbliğatın tələbi ilə xarici ölkələrə verilməsi qəbuledilməzdir.

Spikerin sözlərinə görə, o inanır ki, Çexiya Respublikası ABŞ hökumətinin xəbərdarlıqlarına baxmayaraq üçüncü dünya müharibəsinə doğru gedən “Brüssel qatarından” vaxtında düşəcək. Okamura iddia edib ki, bu müharibəni dəstəkləyənlər silah istehsalının müharibə dövründə onların iqtisadiyyatını bərpa edəcəyinə ümid edirlər. Onun sözlərinə görə, bu iqtisadiyyat “Greenpeace” kimi təşkilatların təsiri ilə zəifləyib, lakin absurda çatan silah istehsalı və satışı uzunmüddətli perspektivdə ərzaq təmin etməyəcək, xüsusilə də Qərbi Avropanın bunu yığılan borclar hesabına planlaşdırdığını nəzərə alsaq. Spiker əlavə edib ki, Qərb üçün öz silah istehsalçılarına ruslar tərəfindən cəbhə xəttinə çatmadan məhv edilən qeyri-effektiv silahlara görə pul ödəmək adi haldır.

Tomio Okamura çıxışında pandemiya və ya müharibə əleyhinə isteriyanın təkrarlanmamasına ümid etdiyini də bildirib.

Qeyd edək ki, ötən ilin noyabr ayında Tomio Okamura Çexiya parlamentinin Deputatlar Palatasının binasından Ukrayna bayrağının endirilməsi ilə bağlı göstəriş verib və “Çexiya Respublikası birinci yerdədir” bəyanatı ilə çıxış edib.

Çexiya spikerinin açıqlamalarına Ukraynanın Çexiyadakı səfiri Vasyl Zvarych də reaksiya verib. Səfir Tomio Okamuranın Yeni il müraciətində səsləndirdiyi fikirləri sərt şəkildə tənqid edərək, bu bəyanatların Rusiya təbliğatının təsiri altında formalaşmış mövqeyi əks etdirdiyini bildirib. Onun sözlərinə görə, Okamuranın Ukrayna, ukraynalılar və xüsusilə də Ukraynanın demokratik yolla seçilmiş rəhbərliyi barədə işlətdiyi təhqiramiz və nifrət dolu ifadələr qəbuledilməzdir, demokratik cəmiyyətin prinsiplərinə və Çexiyanın Avropa cəmiyyətinin ayrılmaz hissəsi kimi söykəndiyi dəyərlərə ziddir.