Aİ: Venesuela xalqının öz gələcəyini müəyyən etmək hüququ qorunmalıdır

Avropa İttifaqı Venesuela xalqının öz gələcəyini sərbəst şəkildə müəyyən etmək hüququnun qorunmalı olduğunu bəyan edib və bütün tərəfləri eskalasiyanın qarşısını almaq üçün sakitliyə və təmkinə çağırıb. B

InterPress.ge xəbər verir ki, bu barədə Avropa İttifaqı tərəfindən yayılan rəsmi bəyanatda qeyd olunub.

Bəyanatda vurğulanır ki, istənilən şəraitdə beynəlxalq hüququn prinsiplərinə və Birləşmiş Millətlər Təşkilatı Nizamnaməsinə hörmət olunmalıdır. Bildirilir ki, beynəlxalq təhlükəsizlik sisteminin əsas dayağı olan BMT Təhlükəsizlik Şurasının üzvləri bu prinsiplərin qorunmasına görə xüsusi məsuliyyət daşıyırlar.

Avropa İttifaqı eyni zamanda Venesuelanın hazırkı rəhbəri Nicolás Maduronun demokratik yolla seçilmiş prezident kimi legitimliyə malik olmadığını bir daha bəyan edib. Qeyd olunub ki, Aİ bu mövqeyini dəfələrlə ifadə edib və blok Venesuelanın suverenliyinə hörmət etməklə, ölkənin öz rəhbərliyi altında demokratiyaya sülh yolu ilə keçidi dəstəkləyir. Bəyanatda Venesuela xalqının öz gələcəyini müəyyən etmək hüququnun toxunulmaz olduğu xüsusi vurğulanıb.

Aİ həmçinin transmillî təşkilatlanmış cinayətkarlıq və narkotik alverinə qarşı mübarizəni qlobal təhlükəsizlik üçün mühüm prioritet kimi qiymətləndirib. Bununla yanaşı bildirilib ki, bu çağırışlar yalnız davamlı əməkdaşlıq, beynəlxalq hüququn, eləcə də ərazi bütövlüyü və suverenlik prinsiplərinin tam şəkildə qorunması yolu ilə həll oluna bilər.

Bəyanatda qeyd edilir ki, Avropa İttifaqı Amerika Birləşmiş Ştatları, həmçinin regional və beynəlxalq tərəfdaşlarla sıx təmasdadır və bütün maraqlı tərəflərlə dialoqun təşviqi istiqamətində fəaliyyət göstərir. Məqsəd Venesuelalıların rəhbərliyi altında böhranın danışıqlar yolu ilə, demokratik, inklüziv və dinc şəkildə həllinə nail olmaqdır.

Qeyd olunub ki, sözügedən bəyanatı Avropa İttifaqına üzv 26 dövlət dəstəkləyib. Yeganə istisna Macarıstan olub.