İrakli Kobaxidze: Bizneslə əhalinin maraqları maksimum dərəcədə balanslaşdırılmalıdır

Gürcüstanın Baş naziri İrakli Kobaxidze ərzaq məhsullarının qiymətləri ilə bağlı fəaliyyət göstərən hökumət əlaqələndirmə komissiyasının bu gün keçirilən iclasında bildirib ki, əsas məqsəd bizneslə əhalinin maraqlarını maksimum dərəcədə balanslaşdırmaq və mümkün olduğu qədər qiymətlərin aşağı salınmasına nail olmaqdır. İclasda distribütor şirkətlərin nümayəndələri də iştirak ediblər.

InterPress.ge xəbər verir ki, distribütor şirkətlərin nümayəndələri ilə keçirilən görüş barədə məlumatı Gürcüstan Hökumətinin Administrasiyasının mətbuat xidməti yayıb.

Məlumata görə, hökumət başçısı ilkin araşdırmanın nəticələrinə əsasən, Gürcüstanda qiymət əlavəsinin orta hesabla 86 faiz təşkil etdiyini və bunun kifayət qədər yüksək göstərici olduğunu bildirib. Baş nazir qeyd edib ki, komissiyanın məqsədi müvafiq tərəflərlə müzakirələr aparmaqla qiymətlərin formalaşma zəncirinin necə işlədiyini müəyyənləşdirmək və qiymətlərin azaldılması üçün hansı imkanların mövcud olduğunu üzə çıxarmaqdır.

“İlkin araşdırma göstərir ki, Gürcüstan sərhədindən piştaxtaya qədər kifayət qədər yüksək qiymət əlavəsi formalaşır və orta göstərici 86 faizə çatır. Bizim qiymətləndirməmizə görə, bu, çox yüksək rəqəmdir. Məsələn, mən şəxsən Almaniyada araşdırdım və orada topdansatışdan piştaxtaya qədər qiymət əlavəsi 20–30 faiz arasında dəyişir ki, bu da standart göstəricidir. Bu fonda 86 faiz çox yüksək görünür. Bu göstəricinin 44 faizi distribüsiya sektorunun payına düşür, şəbəkə marketlərin payı isə nisbətən daha azdır. Ümumilikdə bu 86 faiz Gürcüstanda Avropa qiymətləri ilə müqayisədə xeyli baha qiymətlərin formalaşmasına səbəb olur. Bəzi hallarda qiymətlər 50 faiz daha yüksəkdir, bəzi hallarda isə iki-üç dəfə artıqdır. Biznes öz maraqlarına uyğun fəaliyyət göstərdikdə, bunun çoxlu müsbət cəhətləri var, lakin burada sosial amil də ön plana çıxır və bu, bizim üçün az əhəmiyyət kəsb etmir. Bizim üçün vacibdir ki, bu maraqlar maksimum dərəcədə balanslaşdırılsın və hamılıqla əhalinin maraqlarını qorumağa, mümkün olduğu qədər qiymətlərin aşağı salınmasına çalışaq”, – deyə İrakli Kobaxidze bildirib.

Baş nazir vurğulayıb ki, bu cür görüşlər hökumət üçün mühüm əhəmiyyət daşıyır, çünki sektor nümayəndələri birbaşa olaraq problemlərin harada olduğunu və qiymətlərin azaldılması üçün hansı resursların mövcudluğunu daha dəqiq göstərə bilirlər.

Komissiyanın iclasında Distribütorların Biznes Assosiasiyasının rəhbəri ilə yanaşı, təxminən 15 distribütor şirkətin nümayəndəsi iştirak edib.

Bildirilib ki, gələn həftədən etibarən ərzaq məhsullarının istehsalçıları, eləcə də dərman preparatları və yanacağın qiymətləri ilə bağlı da analoji görüşlərin keçirilməsi planlaşdırılır.