Paata Saliya: Sahibkarlıq subyektləri qeydiyyat məlumatlarını 1 aprel 2026-ya qədər qanuna uyğunlaşdırmalıdır

Qeydiyyat məlumatlarının “Sahibkarlar haqqında” Gürcüstan qanununa uyğunlaşdırılması üçün müəyyən edilmiş müddət uzadılmayacaq.

InterPress.ge xəbər verir ki, bu barədə Gürcüstanın ədliyyə naziri Paata Saliya bildirib.

Nazirin sözlərinə görə, bütün sahibkarlıq subyektləri təsis sənədlərini 2026-cı il 1 aprel tarixinə qədər qanunun tələblərinə uyğunlaşdırmalıdır.

 

Paata Saliya qeyd edib ki, sahibkarların sənədləri qaydaya salmaq üçün kifayət qədər vaxtı olub və qalan müddət ərzində də müvafiq prosedurları keçmək mümkündür. Nazir əlavə edib ki, 20 mart tarixinə qədər xidmətlərdən yararlanmaq istəyənlər bunu yarı qiymətə edə bilərlər.

 

InterPress.ge-nin məlumatına görə, nazir bu öhdəliyin hansı subyektlərə aid olduğunu da açıqlayıb. Onun sözlərinə görə, tələb 2022-ci il 1 yanvar tarixindən əvvəl qeydiyyatdan keçmiş bütün sahibkarlıq subyektlərinə şamil olunur. Bu qayda qeyri-kommersiya hüquqi şəxslərinə və fərdi sahibkarlara aid deyil.

 

Nazir sahibkarları sənədlərini vaxtında qaydaya salmağa çağırıb və vurğulayıb ki, qanunun tələblərinə əməl olunmaması problemlər yarada bilər.

 

Qeyd olunub ki, xidmətlərdən Ədliyyə evlərində, İctimai Reyestrin səlahiyyətli şəxsləri vasitəsilə, eləcə də elektron şəkildə my.gov.ge portalı üzərindən istifadə etmək mümkündür.