Aqil Mustafayev: “Bütün siyasi məhbuslar azad olunmayınca sülh olmayacaq”

“Güclü Gürcüstan – Lelo” partiyasının Kvemo Kartli üzrə nümayəndəsi Aqil Mustafayev partiyanın dialoqun başlanması ilə bağlı bəyanatını dəstəkləyərək bildirib ki, bu təşəbbüs Gürcüstan üçün düzgün və dövlətçilik baxımından strateji yanaşmadır.

InterPress.ge xəbər verir ki, Aqil Mustafayev bu barədə şəxsi “Facebook” səhifəsində yazıb.

Onun sözlərinə görə, “Güclü Gürcüstan – Lelo” tərəfindən Gürcüstan cəmiyyətinə, siyasi partiyalara və hakimiyyətə dialoqun başlanmasının zəruriliyi ilə bağlı edilən çağırış ölkə üçün doğru, dövlətçilik baxımından məsuliyyətli və strateji baxışdır. O qeyd edib ki, Gürcüstanda yaranmış çıxılmaz vəziyyətə “Gürcü Arzusu” hakimiyyətinin apardığı siyasət səbəb olub.

Mustafayev bildirib ki, hakimiyyətin bu bəyanata verdiyi cavab və dialoqdan imtina etməsi ölkədə radikal qüvvənin kim olduğunu açıq şəkildə göstərir və eyni zamanda, kimin ölkədə vətəndaş sülhünü istəmədiyini ortaya qoyur.

Onun sözlərinə görə, qarşıdurma olmadan, seçkilər yolu ilə razılaşma əldə edilməsi və Gürcüstandakı ağır vəziyyətin yumşaldılması vacibdir. Aqil Mustafayev vurğulayıb ki, bütün siyasi məhbuslar azad olunmayınca ölkədə sülh mümkün olmayacaq və bu məsələni “Gürcü Arzusu” hakimiyyəti başa düşməlidir.