Gürcüstanın reytinqi 2025-ci ildə 4 bal azalıb

2025-ci ildə Gürcüstanın azadlıq reytinqi 4 bal azalaraq Avrasiya regionunda ən böyük geriləmə kimi qeydə alınıb.

InterPress.ge xəbər verir ki, bu barədə Freedom House təşkilatının hesabatında bildirilir.

Hesabatda qeyd olunur ki, 2024-cü ildə başlayan hökumət əleyhinə genişmiqyaslı etiraz aksiyaları 2025-ci ildə də davam edib. Bildirilir ki, etirazçılar polis tərəfindən qeyri-proporsional güc tətbiqi və pis rəftarla üzləşiblər.

Eyni zamanda, “Gürcü Arzusu”nun siyasi rəqiblərinin fiziki hücumlara, təzyiqlərə və yeni qanunvericilik məhdudiyyətlərinə məruz qaldığı vurğulanır. Bu məhdudiyyətlərin məqsədinin müxalifət və vətəndaş cəmiyyətinin ictimai proseslərdə iştirakını zəiflətmək olduğu qeyd olunur.

Hesabatda həmçinin bildirilir ki, hökuməti tənqid edən professorlar işdən azad olunma riski ilə üzləşiblər. Bu isə hakim partiyanın təhsil sistemi üzərində siyasi nəzarəti genişləndirmək cəhdlərinin bir hissəsi kimi qiymətləndirilir.

Bundan əlavə, qeyd olunur ki, hökumət müxalifət nümayəndələrini araşdırmaq üçün parlament komissiyası yaradıb və iştirakdan imtina edən şəxslər saxlanılıb, bəzilərinə isə uydurma ittihamlarla həbs cəzaları verilib.

Freedom House vurğulayır ki, bu amillər Gürcüstanın il ərzində 4 ballıq geriləməsinə səbəb olub və bu, Avrasiya regionunda ən böyük azalma hesab olunur.

Qeyd edək ki, 2025-ci ildə siyasi hüquqlar və vətəndaş azadlıqları üzrə Gürcüstandan daha ciddi geriləmə yalnız bir neçə ölkədə qeydə alınıb – Qvineya-Bisau (8 bal), Tanzaniya (7 bal), Burkina-Faso (5 bal), Salvador (5 bal) və Madaqaskar (5 bal).