“Güclü Gürcüstan – Lelo” genişmiqyaslı amnistiya təşəbbüsü ilə çıxış edib

“Güclü Gürcüstan – Lelo” koalisiyası Gürcüstanda genişmiqyaslı və ədalətli amnistiyanın elan edilməsini təklif edib.

InterPress.ge xəbər verir ki, bu barədə keçirilən brifinqdə “Güclü Gürcüstan – Lelo”nun üzvü Lana Qaldava açıqlama verib. Onun sözlərinə görə, amnistiya cəmiyyətdə barışığın əldə olunması, siyasi gərginliyin azaldılması və humanist dövlətə doğru mühüm addım olmalıdır.

“Bu gün ölkə çox ağır siyasi böhran yaşayır və bunu daha da dərinləşdirən əsas amil son dərəcə qütbləşmiş mühitdir. Bu vəziyyət dövlətin normal inkişafına, institutların sağlamlaşdırılmasına və ictimai birliyin bərpasına mane olur”, – deyə Lana Qaldava bildirib.

O qeyd edib ki, Gürcüstanda həm məhkumların, həm də qeyri-həbs cəzalarına məruz qalan şəxslərin sayı kritik həddə çatıb.

“Sakstatın 2025-ci il məlumatına görə, məhkumların sayı 22 767 nəfər, həbsdə olanların sayı isə 11 153 nəfərdir. Penitensiar sistemin təcili və fundamental islahata ehtiyacı var”, – deyə o vurğulayıb.

Qaldavanın sözlərinə görə, həbsxanalarda məhbusların hüquqları, qidalanma şəraiti, gündəlik yaşayışı və təhlükəsizlik vəziyyəti ağır durumdadır, həmçinin “qanuni oğru” aləminin təsiri yenidən güclənib.

O bildirib ki, son dövrdə penitensiar sistem rəhbərliyində baş verən hadisələr – həbsxana rəhbərinin intiharı və yüksək vəzifəli şəxslərin saxlanılması sistemdə ciddi böhranın göstəricisidir.

“Bu gün Gürcüstan həbsxanaları siyasi motivlərlə saxlanılan insanlarla doludur. Vətəndaşlar antidemokratik və sərt qanunlar əsasında hər gün həbs olunurlar. Aksiyalar zamanı saxlanılan vicdan məhbusları faktiki olaraq siyasi motivlə cəzalandırılırlar. Bu, ədalət deyil, siyasi təqibdir”, – deyə Lana Qaldava bildirib.

Onun sözlərinə görə, “Güclü Gürcüstan – Lelo” hesab edir ki, daimi cəza sərtləşdirmələri problemin həlli deyil və dövlət əsas diqqəti cinayətlərin qarşısının alınmasına, insanların reabilitasiyasına və həbs şəraitinin yaxşılaşdırılmasına yönəltməlidir.

“Qütbləşmənin aradan qaldırılması, mövcud ağır siyasi vəziyyətin yumşaldılması və ölkə üçün yeni siyasi məkanın açılması məqsədilə ‘Güclü Gürcüstan – Lelo’ genişmiqyaslı və ədalətli amnistiyanın elan olunması təşəbbüsü ilə çıxış edir”, – deyə Lana Qaldava qeyd edib.