Avropa İttifaqı və üzv ölkələr Gürcüstanı Müstəqillik Günü münasibətilə təbrik edib

Avropa İttifaqı və üzv ölkələrin səfirlikləri Gürcüstanı Müstəqillik Günü münasibətilə təbrik edib.

InterPress.ge xəbər verir ki, bu barədə Avropa İttifaqının nümayəndəliyi və üzv ölkələrin səfirliklərinin birgə bəyanatında bildirilib.

Avropa ölkələrinin nümayəndəlikləri qeyd ediblər ki, “bu mühüm gündə Avropa İttifaqı Gürcüstanın beynəlxalq səviyyədə tanınmış sərhədləri çərçivəsində müstəqilliyinə, suverenliyinə və ərazi bütövlüyünə sarsılmaz dəstəyini bir daha təsdiqləyir”.

Bəyanatda vurğulanır ki, Gürcüstan 1918-ci il mayın 26-da müstəqilliyini elan etməklə suveren və demokratik dövlətçiliklə bağlı baxışını təsdiqləyib.

“Müstəqillik Bəyannaməsinin ruhu bu gün də Gürcüstan cəmiyyətində dərin əks-səda doğurur. Gürcüstan tarixində Avropa ilə daha sıx əlaqələrə doğru davamlı istəyi görürük. Son üç onillik ərzində Avropa İttifaqı və üzv dövlətlər Gürcüstanın yanında olub və etibarlı, uzunmüddətli tərəfdaş olaraq qalır. Demokratik islahatlar, qanunun aliliyi və fundamental azadlıqların qorunması istiqamətində irəliləyiş Avropa yolunda irəliləmək üçün hələ də mühüm əhəmiyyət daşıyır”, – deyə bəyanatda qeyd olunub.

Sənəddə həmçinin bildirilir ki, Avropa İttifaqı və üzv ölkələr bu əlamətdar gündə Gürcüstanın müstəqilliyi, suverenliyi və ərazi bütövlüyünə dəstəyini yenidən təsdiqləyir.