Qırmızı Körpü gömrük-keçid məntəqəsində rüşvətxorluq - Bir nəfər saxlanılıb
Gürcüstan Maliyyə Nazirliyinin İstintaq Xidmətinin əməkdaşları Prokurorluq və Gəlirlər Xidməti ilə birgə həyata keçirdikləri əməliyyat-axtarış və istintaq tədbirləri nəticəsində “Qırmızı Körpü” gömrük-keçid məntəqəsinin növbə rəisini külli miqdarda rüşvət alma ittihamı ilə saxlayıblar.
InterPress.ge xəbər verir ki, bu barədə Maliyyə Nazirliyinin İstintaq Xidməti məlumat yayıb.
İstintaqla müəyyən edilib ki, təqsirləndirilən şəxs xidməti vəzifəsini yerinə yetirərkən bir vətəndaşa 200 min ABŞ dollarını məcburi gömrük bəyannaməsi təqdim etmədən Gürcüstana keçirməyə kömək edəcəyini vəd edib.
Bunun müqabilində dövlət məmuru hər belə hal üçün 8 min ABŞ dolları məbləğində rüşvət tələb edib.
Əməliyyat zamanı hüquq-mühafizə orqanlarının əməkdaşları onu əvvəlcədən tələb etdiyi məbləğin bir hissəsi – 4 min ABŞ dollarını aldığı anda saxlayıblar.
Məhkəmənin qərarı əsasında həyata keçirilən gizli istintaq tədbirləri nəticəsində cinayət əməlini təsdiqləyən audio və video sübutlar əldə olunub.
Faktla bağlı Gürcüstan Cinayət Məcəlləsinin 338-ci maddəsinin 2-ci hissəsinin "b" bəndi ilə istintaq aparılır. Həmin maddə 7 ildən 11 ilədək azadlıqdan məhrumetmə cəzasını nəzərdə tutur.
Maliyyə Nazirliyinin İstintaq Xidməti dövlət qulluqçularını və onlarla qanunsuz sövdələşməyə girmək istəyən şəxsləri bu cür əməllərdən çəkinməyə çağıraraq bildirib ki, oxşar qanun pozuntularına hüquq-mühafizə orqanları tərəfindən dərhal və qanun çərçivəsində sərt reaksiya veriləcək.
