ATƏT Parlament Assambleyası “Haaqa Bəyannaməsi”ni qəbul etdi – Gürcüstanla bağlı qətnamədə demokratiya, insan hüquqları və işğal məsələləri yer alıb
ATƏT Parlament Assambleyası qəbul etdiyi “Haaqa Bəyannaməsi”ndə Gürcüstanın suverenliyi və ərazi bütövlüyünə dəstəyini bir daha təsdiqləyib.
InterPress.ge xəbər verir ki, bəyannamədə Assambleya 2024-cü il parlament seçkilərindən sonra Gürcüstanda baş verən hadisələrlə bağlı ciddi narahatlığını ifadə edir.
Sənəddə qeyd olunur ki, narahatlığa səbəb olan məsələlər sırasında demokratik geriləmə, etirazçılara, müxalifət nümayəndələrinə və jurnalistlərə qarşı zorakılıq, müstəqil mediaya tətbiq olunan məhdudiyyətlər, həmçinin aparıcı müxalifət partiyalarının qadağan edilməsinə cəhdlər yer alır. Bildirilir ki, bu məqamlar 2026-cı ilin mart ayında dərc edilmiş “Moskva Mexanizmi” hesabatında da öz əksini tapıb.
Assambleya eyni zamanda Gürcüstan xalqına, demokratik idarəçiliyə, siyasi plüralizmə və fundamental azadlıqların qorunmasına dəstəyini bir daha ifadə edir. Sənəddə demokratik institutların, qanunun aliliyinin qorunmasının və siyasi proseslərin inklüziv, şəffaf, eləcə də ATƏT qarşısında götürülmüş öhdəliklərə uyğun aparılmasının vacibliyi vurğulanır.
Bəyannamədə Gürcüstanın beynəlxalq səviyyədə tanınmış sərhədləri çərçivəsində suverenliyi və ərazi bütövlüyünə dəstək bir daha təsdiqlənir, həmçinin Rusiyanın Abxaziya və Cənubi Osetiya/Sxinvali bölgələrini işğal etməsi qəti şəkildə pislənilir.
ATƏT Parlament Assambleyası Gürcüstan hakimiyyətini vətəndaş cəmiyyətinin, müstəqil medianın və müxalifətin sərbəst və təhlükəsiz fəaliyyətini təmin etməyə, zorakılıqdan və siyasi motivli təqiblərdən çəkinməyə, demokratik prinsiplərə əsaslanan inklüziv siyasi prosesi təşviq etməyə və “Moskva Mexanizmi” hesabatında yer alan tövsiyələri tam və operativ şəkildə yerinə yetirməyə çağırıb.
Sənəddə həmçinin vurğulanır ki, 2026-cı il “Moskva Mexanizmi” hesabatı ölkədə demokratik geriləmə, fundamental hüquq və azadlıqların, eləcə də məhkəmə müstəqilliyinin qanunvericilik, inzibati və cinayət-hüquqi tədbirlərlə məhdudlaşdırıldığını qeyd edir. Hesabatda bəzi hallarda zorakılığın işgəncə həddinə çatdığı da vurğulanıb.
Assambleya eyni zamanda ATƏT Parlament Assambleyasının yüksək səviyyəli nümayəndə heyətinin 2026-cı ilin mart ayında Gürcüstana səfərini parlament dialoqunun gücləndirilməsi baxımından müsbət addım kimi qiymətləndirib.
Bəyannamədə Gürcüstanda inklüziv siyasi dialoqa və siyasi gərginliyin sülh yolu ilə həllinə dəstək ifadə olunur. Bununla yanaşı, vətəndaş cəmiyyətini, media azadlığını, ifadə, birləşmə və dinc toplaşmaq hüquqlarını məhdudlaşdıran qanunvericiliyin qəbul və tətbiqi, eləcə də dinc etirazçılara, jurnalistlərə və vətəndaş cəmiyyəti nümayəndələrinə qarşı həddindən artıq güc tətbiqi qətiyyətlə pislənir.
Assambleya bu cür qanunların ləğv edilməsinə, zorakılıq, hədə-qorxu və özbaşına həbslərin dərhal dayandırılmasına, öz hüquqlarından dinc şəkildə istifadə etdiklərinə görə saxlanılmış bütün şəxslərin azad olunmasına, həmçinin 2024-cü il etiraz aksiyaları da daxil olmaqla, həddindən artıq güc tətbiqi ilə bağlı bütün iddiaların operativ və müstəqil araşdırılmasına, günahkarların məsuliyyətə cəlb edilməsinə və zərərçəkənlərə kompensasiyanın ödənilməsinə çağırış edib.
