İrakli Kobaxidze: ATƏT PA-nın qətnaməsi Gürcüstana qarşı aparılan kampaniyanın tərkib hissəsidir
Gürcüstanın Baş naziri İrakli Kobaxidze bildirib ki, ölkəyə qarşı aparılan "absurd, lakin ağır proses" hakimiyyətin prinsipial milli mövqeyi ilə əlaqədardır və bu proses çərçivəsində Gürcüstana qarşı müxtəlif təsir vasitələrindən, o cümlədən Avropanın bir vaxtlar nüfuzlu institutlarından istifadə olunur.
InterPress.ge xəbər verir ki, Baş nazir bu barədə Hökumət Administrasiyasında keçirilən brifinqdə danışıb.
Kobaxidzenin sözlərinə görə, ATƏT Parlament Assambleyasının qəbul etdiyi qətnamə də bu prosesin tərkib hissəsidir.
Baş nazir bildirib ki, 2022-ci ildən sonra Gürcüstan "Deep State"in əsas hədəfinə çevrilib. Onun sözlərinə görə, bunun səbəbi Gürcüstanın Rusiyaya qarşı ikinci cəbhənin açılmasından və sanksiyalara qoşulmaqdan imtina etməsi, milli maraqlarına zidd addımlar atmaması, suverenliyini, sülhünü və iqtisadiyyatını qorumağı seçməsi olub.
Kobaxidzenin fikrincə, məhz hakimiyyətin bu prinsipial milli mövqeyi səbəbindən ölkəyə qarşı kampaniya başladılıb və bu kampaniyada "Deep State"in arsenalında olan bütün vasitələrdən, o cümlədən Avropa institutlarından istifadə edilir.
Baş nazir qeyd edib ki, ATƏT Parlament Assambleyasının qətnaməsində yer alan ittihamlar Avropa bürokratiyasının Gürcüstanda radikalizm və inqilabi prosesləri təşviq etmək üçün istifadə etdiyi iddiaları təkrarlayır. Onun sözlərinə görə, məqsəd hakimiyyət dəyişikliyinə nail olmaq və "özlərinə tabe agenturanı" yenidən hakimiyyətə gətirməkdir.
Kobaxidze vurğulayıb ki, qətnamədə səsləndirilən ittihamların əsassız olduğunu ATƏT-in öz sənədləri və bəyanatları da təsdiqləyir.
Baş nazir xatırladıb ki, qətnamədə 2024-cü il parlament seçkilərinin legitimliyi şübhə altına alınır, halbuki həmin seçkilər ATƏT və DTİHB (ODIHR) tərəfindən baş tutmuş və rəqabətli seçkilər kimi qiymətləndirilib.
O, çıxışında ATƏT Parlament Assambleyasında İsveçrə nümayəndə heyətinin rəhbəri Daniel Fesslerin sözlərinə istinad edərək bildirib:
"Gürcüstanda keçirilən seçkilər ideal şəkildə təşkil olunmuşdu, ədalətli idi və heç bir pozuntu qeydə alınmamışdı. Sadəcə nəticələr bəzi Avropa ölkələri üçün arzuolunmaz oldu."
Kobaxidzenin sözlərinə görə, narazılığın əsas səbəbi Gürcüstan vətəndaşlarının 2024-cü ildə də milli hakimiyyəti dəstəkləməsi olub. O əlavə edib ki, bu seçimin şüurlu olduğunu 2025-ci ildə keçirilən yerli özünüidarəetmə seçkilərinin nəticələri də təsdiqləyib. Baş nazirin sözlərinə görə, həmin seçkilərdə hakim partiyaya 1 milyon 100 mindən çox seçici bir daha etimad göstərib.
