“Atlantic Council”: Gürcüstan rifah indeksinin artım tempinə görə dünyada birinci olub
“Atlantic Council”un Azadlıq və Rifah Mərkəzi 2026-cı il üçün Azadlıq və Rifah İndekslərini açıqlayıb. Hesabata əsasən, Gürcüstan azadlıq indeksində “orta səviyyədə azad”, rifah indeksində isə “orta səviyyədə rifaha malik” ölkə statusu əldə edib.
InterPress.ge xəbər verir ki, hesabatda Gürcüstan uzunmüddətli inkişaf nümayiş etdirən ölkələr sırasında xüsusi olaraq qeyd olunur. Məlumata görə, ölkə 2013–2025-ci illər ərzində rifah indeksinin yaxşılaşma tempinə görə dünyada birinci yerdə qərarlaşıb.
Hesabatda bildirilir ki, Gürcüstan rifah indeksində indiyədək əldə etdiyi ən yüksək nəticəni – 100 ballıq sistem üzrə 78,2 balı qeydə alıb. Bununla yanaşı, ölkə 2012-ci ildən etibarən rifah reytinqində 21 pillə irəliləyib, ümumi qiymətləndirmə isə 8,6 bənd artaraq dünyada ən yüksək yüksəliş göstəricisi olub.
Rifah indeksi altı əsas meyar – gəlir səviyyəsi, ətraf mühitin qorunması, azlıqların hüquqlarının müdafiəsi, ictimai səhiyyə, təhsil və bərabərlik əsasında formalaşdırılır.
Dünyanın 171 ölkə və ərazisini əhatə edən reytinqdə Gürcüstan 43-cü yerdə qərarlaşıb və “orta rifah” kateqoriyasına daxil edilib. Hesabat müəlliflərinin qiymətləndirməsinə görə, ölkənin “yüksək rifah” statusu əldə etməsi üçün cəmi bir pillə irəliləməsi kifayətdir.
Sənəddə vurğulanır ki, Gürcüstan rifah göstəricilərinə görə Avropa İttifaqına namizəd olan bütün ölkələri, eləcə də Avropa İttifaqı və NATO üzvü olan Bolqarıstan, Türkiyə, Albaniya, Şimali Makedoniya və Monteneqronu qabaqlayır.
Azadlıq indeksinin siyasi azadlıqlar bölməsində Gürcüstan ən yüksək nəticəni “Seçkilər” meyarı üzrə əldə edib. Bu göstərici 77,3 faiz, “Vətəndaş azadlıqları” meyarı üzrə isə 75,2 faiz təşkil edib.
Bundan əlavə, azlıqların hüquqlarının müdafiəsi reytinqində Gürcüstan dünyanın 40 ən yaxşı ölkəsi sırasında yer alaraq 39-cu pillədə qərarlaşıb.
Qeyd edək ki, Azadlıq və Rifah İndeksləri “Atlantic Council”un Azadlıq və Rifah Mərkəzi tərəfindən hazırlanır və Dünya Bankı, BMT, Fraser Institute, Heritage Foundation və digər nüfuzlu beynəlxalq təşkilatların göstəriciləri, elmi tədqiqatları və ekspert qiymətləndirmələri əsasında tərtib olunur.
