Tengiz Şarmanaşvili: “Çipləri çıxarmaq üçün paltaryuyan maşınların Rusiyaya gətirilməsindən yenə danışırlar? Rusiyanın Çinlə 4 min kilometrdən çox sərhədi var!”

Gürcüstan parlamentinin Müdafiə və Təhlükəsizlik Komitəsi sədrinin birinci müavini Tengiz Şarmanaşvili paltaryuyan maşınlar və çiplərin Gürcüstana gətirilərək daha sonra Rusiya ərazisinə keçirilməsi ilə bağlı yayılan iddialara münasibət bildirib. O, bu iddiaların heç bir məntiqə sığmadığını deyib.

InterPress.ge xəbər verir ki, deputatın sözlərinə görə, Rusiyanın Çinlə minlərlə kilometr uzunluğunda sərhədi olduğu halda, Gürcüstanın tranzit marşrutu kimi nəzərdən keçirilməsi məntiqsizdir.

“Çipləri çıxarmaq üçün paltaryuyan maşınların Rusiyaya gətirilməsindən yenə danışırlar? Paltaryuyan maşınların ən azı 80 faizi Çində istehsal olunur. Rusiyanın Çinlə 4 min kilometrdən çox sərhədi var! 4 min! Əgər lazım gələrsə, Çindən nəyinsə gətirilməsi üçün kimə Gürcüstan ərazisi nə üçün lazım olsun? Bu, çox ağır vəziyyətdir, heç ağlabatan yalan belə danışa bilmirlər!” – deyə Şarmanaşvili yazıb.