Jaba Xubua: “İvanişvilinin gürcü xalqı qarşısında əsas xidməti 2012-ci il oktyabrın 1-də Gürcüstanı rejimdən azad etməsidir”

Gürcüstanlı jurnalist Jaba Xubua Bidzina İvanişvilinin ölkədəki fəaliyyətinə dair fikirlərini bölüşüb.

InterPress.ge xəbər verir ki, Xubua sosial şəbəkədə paylaşımında İvanişvilinin Gürcüstan və gürcü xalqı qarşısında əsas xidmətinin 2012-ci il oktyabrın 1-də hakimiyyət dəyişikliyinə nail olması olduğunu bildirib.

Onun sözlərinə görə, İvanişvilinin əsas xidməti kreditlərin silinməsi, Müqəddəs Üçlük Katedralinin tikintisinin maliyyələşdirilməsi, kilsə və monastırların bərpası, məktəb, uşaq bağçası, universitet və teatrların təmiri və digər xeyriyyə layihələri deyil.

“Gürcüstan və gürcü xalqı qarşısında Bidzina İvanişvilinin əsas xidməti nə kreditlərin silinməsidir, nə Müqəddəs Üçlük Katedralinin tikintisinin maliyyələşdirilməsidir, nə də digər kilsə-monastırların bərpası və yenidən qurulmasıdır. Həmçinin dövlət məktəblərinin, uşaq bağçalarının, universitetlərin və teatrların təmiri, inventarlaşdırılması və ya yenilərinin tikilməsi də deyil. Tibbi, istirahət, idman və mədəniyyət sahələrində həyata keçirilən layihələr, ümumiyyətlə, onun xərclədiyi 3 milyard lari həcmində xeyriyyə fəaliyyətinin heç biri onun əsas xidməti deyil.

Gürcü xalqı qarşısında İvanişvilinin əsas xidməti 2012-ci il oktyabrın 1-də etdiyi – Gürcüstanı qanlı, cəllad, qatil, işgəncə verən, antigürcü və antihumanist rejimdən azad etməsidir”, – deyə Xubua yazıb.

Jurnalistin sözlərinə görə, məhz bu, İvanişvilinin Gürcüstan qarşısında ən böyük və əsas xidməti, ölkənin “xarici və daxili düşmənləri” qarşısında isə “əsas günahı”dır.

Xubua hesab edir ki, İvanişvilinin ölkədə hakimiyyət dəyişikliyinə nail olması ilə bağlı narazı qüvvələr onun bu addımını bağışlamamağa çalışacaqlar.

“Bütün qalan məsələlər, o cümlədən hazırda gündəmə gətirilən kreditlərin silinməsi mövzusu da məhz bundan qaynaqlanır”, – deyə jurnalist bildirib.