Parlament yığım pensiyaları ilə bağlı təşəbbüsü üçüncü oxunuşda qəbul edib

Gürcüstan parlamenti yığım pensiyaları ilə bağlı qanunvericilik təşəbbüsünü üçüncü oxunuşda 76 səslə yekdilliklə qəbul edib.

InterPress.ge xəbər verir ki, qanunvericilik paketi 2025-ci il mayın 1-dən sonra Pensiya Fondu tərəfindən işəgötürənlərə tətbiq edilmiş cərimələrdən azad olunmasını nəzərdə tutur. Bunun üçün işəgötürənlər 2026-cı il dekabrın 31-dək pensiya ödənişlərini və hesablanmış dəbbə pullarını tam ödəməlidirlər.

Bundan əlavə, cərimələrin məbləği də azaldılır. İlk və təkrar pozuntu hallarında hazırkı 500 və 1 000 lari əvəzinə cərimə 300 lari olacaq.

Qanun layihəsi pensiya ödənişlərini həyata keçirmək öhdəliyinin pozulması ilə bağlı münasibətlərin yeni qaydada tənzimlənməsini nəzərdə tutur. Belə ki, layihə ilə “alınmamış fayda” anlayışı müəyyən edilir, pensiya ödənişi öhdəliyinin pozulmasının aşkar edilməsi, işəgötürənə cərimə tətbiq edilməsi və iştirakçı üçün alınmamış faydanın hesablanması, onların icrası və şikayət edilməsi qaydaları müəyyənləşdirilir.

Həmçinin həyata keçirilməmiş pensiya ödənişlərinin və alınmamış faydanın hissə-hissə, mərhələli şəkildə ödənilməsi imkanı yaradılır.

Layihəyə əsasən, Pensiya Fondunun Mübahisələrə Baxılması Xidməti yaradılır və bu qurum tərəfindən şikayətlərə baxılması və qərarların qəbul edilməsi qaydaları müəyyənləşdirilir.

Bununla yanaşı, bu gün qanun layihəsinin məruzəçisi, parlamentin Maliyyə-Büdcə Komitəsinin sədri Paata Kviçinadzə bildirib ki, təqdim olunan qanun layihəsinə məzmun xarakterli 3 dəyişiklik edilib.

Onun sözlərinə görə, cərimələrdən şikayət verilməsi üçün ümumi 30 günlük müddət tətbiq olunacaq. Bu, əvvəl nəzərdə tutulan 10 günlük müddəti əvəz edir.

Bundan əlavə, cərimənin ictimaiyyətə açıqlanması üçün nəzərdə tutulan 10 təqvim günü müddəti 10 iş günü ilə əvəzlənib.

Həmçinin pensiya borcunun hissə-hissə ödənilməsinin maksimum 18 ay müddətində məhdudlaşdırılması tələbi aradan qaldırılıb.