Ukrayna ilə bağlı beynəlxalq görüş Türkiyədə keçirilə bilər

Rəsmi Ankara oktyabrın sonuna qədər Ukraynadakı münaqişənin həlli üçün beynəlxalq görüş təşkil etməyi planlaşdırır.

InterPress.ge xəbər verir ki, bu barədə Bloomberg mənbələrə istinadən məlumat yayıb.

Qeyd olunub ki, ABŞ prezidentinin milli təhlükəsizlik üzrə köməkçisi Ceyk Sallivan da daxil olmaqla müxtəlif ölkələrin milli təhlükəsizlik müşavirləri məsləhətləşmələr üçün İstanbula gedəcək.

Rusiya tərəfi görüşə dəvət olunmayıb, Çinin nümayəndə göndərib-göndərməyəcəyi hələlik məlum deyil.

Gündəmin mərkəzində Ukrayna prezidenti Volodimir Zelenskinin sülh planı və Kiyevin bu təşəbbüsü müzakirə etmək üçün 2023-cü ildə qlobal toplantı təşkil etmək niyyəti olacaq.