Vladimir Putin: Rusiya Qərbə hücum etmək üçün başqa ölkələrə silah verə bilər

Rusiya prezidenti Vladimir Putin Qərbin Ukraynaya uzaqmənzilli silahlar verməsini tənqid  edib.

InterPress.ge xəbər verir ki, Putinin sözlərinə görə, Moskva Qərb hədəflərini vurmaq üçün digər ölkələrə də oxşar silahlar verə bilər.

"Əgər kimsə hesab edir ki, ərazimizə zərbə endirmək və bizi narahat etmək üçün belə silahların döyüş bölgəsinə çatdırılması mümkündür, bəs niyə bizim Rusiyaya münasibətdə bunu edən ölkələrin həssas hədəflərinə zərbələr endiriləcək dünyanın regionlarına eyni sinifli silahların çatdırılmasına icazə verilmir?"- Putin bildirib.

Putin bu vəziyyətdə Rusiyanın cavabının asimmetrik ola biləcəyini qeyd edib.

Onun sözlərinə görə, Qərb ölkələrinin Ukraynaya silah verməsi münaqişədə birbaşa iştirakdır.Eyni zamanda, Kiyevə yüksək dəqiqlikli uzaqmənzilli silahların göndərilməsi “çox ciddi problemlərə” aparan yoldur. Onun sözlərinə görə, bu cür hərəkətlər beynəlxalq münasibətləri tamamilə məhv edəcək və beynəlxalq təhlükəsizliyə xələl gətirəcək.

Putin bildirib ki, Şimali Atlantika Alyansı ölkələrinin nümayəndələri Ukraynanın Rusiya ərazisindəki hədəfləri vurmasına icazə vermək planlarından danışarkən “nə ilə oynadıqlarını” bilməlidirlər.