Marneulidə çörəyin qiymətini qaldırmayan vətəndaş merin qardaşı və onun ətrafı tərəfindən döyülüb - Bayramova
İctimai fəal Samirə Bayramova sosial şəbəkədə Marneulidə baş verdiyi iddia olunan insidentlə bağlı paylaşım edib.
InterPress.ge xəbər verir ki, Bayramovanın sözlərinə görə, Marneuli merinin qardaşı öz ətrafı ilə birlikdə bir vətəndaşı ağır şəkildə döyüb.
O bildirib ki, merin ailə üzvləri artıq bir həftədən çoxdur şəhərdə gərginlik yaradır. İddialara görə, onlar şəxsi biznes maraqları naminə çörəyin qiymətini süni şəkildə artırıb və digər sahibkarları da buna məcbur ediblər. Bayramovanın sözlərinə görə, tələblərə tabe olmayan şəxslərdən biri döyülüb.
Fəal qeyd edib ki, hadisə barədə ilkin məlumatı hadisə yerində olan taksi sürücüsündən alıb, daha sonra isə başqa bir vətəndaş onunla əlaqə saxlayaraq polisə şikayət etmək istədiyini bildirib.
Bayramova zərərçəkənə və ailəsinə mediaya müraciət etməyə çağırış edib və bildirib ki, bu, faktın gizlədilməsinin qarşısını ala bilər.
Onun sözlərinə görə, hazırda hadisə ilə bağlı Marneuli polisində mer, onun müavini və parlament deputatının da olduğu bildirilir ki, bu da prosesə onların mümkün müdaxiləsi ilə bağlı şübhələr yaradır.
Fəal qeyd edib ki, baş verənlər şəhərdə qanunun deyil, təsir və zorakılığın işlədiyini göstərən ciddi siqnaldır.
O, aidiyyəti qurumları faktın obyektiv və hərtərəfli araşdırılmasını təmin etməyə çağırıb və vurğulayıb ki, qanun qarşısında bütün vətəndaşlar bərabərdir, hər hansı zorakılıq və ya səlahiyyətlərdən sui-istifadə hüquqi qiymətini almalıdır.
