Milli Bank əhaliyə xəbərdarlıq edir

Gürcüstan Milli Bankı sosial şəbəkələrdə, o cümlədən Facebook səhifə və qruplarında kriptoaktivlərlə ticarətə investisiya qoymaq və bu yolla gəlir əldə etmək təklifləri ilə bağlı aktivləşən kampaniyalardan vətəndaşları ehtiyatlı olmağa çağırıb.

InterPress.ge xəbər verir ki, bu barədə Milli Bankın İstehlakçı Hüquqlarının Müdafiəsi Departamentinin rəhbəri Laşa Gzirişvili məlumat verib. O, vətəndaşlara vəsaitlərini yatırmazdan əvvəl mümkün riskləri diqqətlə qiymətləndirməyi və pul itirmək ehtimalını nəzərə almağı tövsiyə edib.

Gzirişvilinin sözlərinə görə, bu cür fəaliyyət klassik “maliyyə piramidası” modelini xatırlada bilər. Belə sxemlərdə əsas məqsəd vəsaitləri real biznesə və ya gəlir gətirən aktivlərə yatırmaq deyil, sistemə yeni iştirakçıların cəlb edilməsi və onların pullarının əldə olunmasıdır.

Onun izahına görə, sxemin ilkin mərhələsində yeni iştirakçıların sayı artdığı üçün kampaniya kifayət qədər uğurlu görünə və bəzi iştirakçılar müəyyən gəlir əldə edə bilərlər. Lakin yeni üzvlərin və əlavə vəsaitlərin cəlb edilməsi çətinləşdikdə şirkət iştirakçılar qarşısında öhdəliklərini yerinə yetirə bilmir və nəticədə sxem dağılır.

“Belə hallarda iştirakçılara vəsaitlərini çıxarmaqdan müxtəlif texniki səbəblərlə imtina edilir, bəzən isə yatırılan vəsaitin geri qaytarılması üçün əlavə pul tələb olunur”, – deyə Gzirişvili bildirib.

Milli Bank rəsmisi qeyd edib ki, bəzi insanlar sxemin risklərini bilsələr də, sistem dağılana qədər yatırdıqları vəsaitdən gəlir əldə edə biləcəkləri ümidi ilə iştirak edirlər. Lakin iştirakçının sxemə hansı mərhələdə qoşulduğunu bilməməsi və onun nə vaxt çökəcəyini əvvəlcədən müəyyənləşdirməyin praktiki olaraq mümkün olmaması maliyyə itkiləri riskini artırır.

Gzirişvili vətəndaşlara xüsusilə cəlbedici investisiya təklifləri qarşısında tələsik qərar verməməyi, şirkətin etibarlılığı, fəaliyyəti və ödəmə qabiliyyəti barədə ətraflı məlumat toplamağı tövsiyə edib.

O, həmçinin xəbərdarlıq edib ki, bəzi şirkətlər vətəndaşları çaşdırmaq məqsədilə adlarında “maliyyə”, “broker”, “investisiya” və digər oxşar terminlərdən istifadə edə bilərlər. Lakin bu, şirkətin müvafiq tənzimləyici qurum tərəfindən avtomatik olaraq lisenziyalaşdırıldığı və ya tənzimləndiyi anlamına gəlmir.

Milli Bank vətəndaşlara sxemdə yalnız uğur qazanan iştirakçıların deyil, uğursuzluqla üzləşən şəxslərin təcrübələrini və bunun səbəblərini də araşdırmağı tövsiyə edir.

Gzirişvilinin sözlərinə görə, Milli Bank istehlakçıların hüquqlarının qorunması məqsədilə qanunvericilik bazasını daim təkmilləşdirir. Bununla belə, son qərarı istehlakçının özü verdiyi üçün investisiya təkliflərini diqqətlə araşdırmaq və mümkün riskləri qiymətləndirmək vacibdir.