Gürcüstanda Milli Tədris Planına dəyişiklik edilib – şagirdlərin qiymətləndirilməsi qaydaları yenilənib

Gürcüstanın təhsil, elm və gənclər naziri Givi Mikanadzenin qərarı ilə Milli Tədris Planına dəyişikliklər edilib.

InterPress.ge xəbər verir ki, sənədə əsasən, dövlət məktəblərində şagirdlər semestr ərzində üç komponent üzrə qiymətləndiriləcəklər: cari ev tapşırığı, cari sinif tapşırığı və yekun tapşırıq. Hər üç komponent eyni çəkiyə malik olacaq.

Eyni zamanda, şagirdin hər hansı fənn üzrə illik qiyməti 5,0-dan aşağı olarsa, məktəb payız imtahanı keçirilməzdən əvvəl ona remediasiya proqramı təklif etməyə borclu olacaq.

“Əgər dövlət məktəbi hər hansı fənn və ya fənlər üzrə şagirdin qiymətləndirilməsi üçün yalnız yekun tapşırıq komponentindən istifadə etmək qərarına gələrsə, məktəb müvafiq əsaslandırmanı razılaşdırılması üçün həmin məktəbin yerləşdiyi ərazi üzrə səlahiyyətli Təhsil Resurs Mərkəzinə təqdim etməyə borcludur. Abxaziya və Acarıstan Muxtar Respublikalarının ərazilərində yerləşən dövlət məktəbləri üçün əsaslandırma eyni prosedurlara riayət olunmaqla təhsil sahəsində səlahiyyətli müvafiq nazirliyə təqdim edilir.

Yekun tapşırıq komponentində əldə edilmiş biliklərin praktikada tətbiqini və mürəkkəb problemlərin həllini tələb edən yaradıcı və kontekstli tapşırıqlardan istifadə məcburidir. Bunlara esse, layihə, tədqiqat və ya sahə hesabatı, yaradıcı məhsul, məlumatların təhlili və digər tapşırıqlar daxildir. Yekun tapşırığın etibarlılığını və obyektivliyini təmin etmək üçün əvvəlcədən hazırlanmış qiymətləndirmə meyarlarından – qiymətləndirmə rubrikasından istifadə olunması məcburidir. Tədris prosesinin şəffaflığı məqsədilə həmin meyarlar əvvəlcədən şagirdə təqdim edilməlidir.

Əgər dövlət məktəbinin şagirdi dərsdə iştirak etmədiyi üçün hər hansı yekun tapşırığı yerinə yetirə bilməyibsə, məktəb ona buraxdığı yekun tapşırıqları bərpa etmək imkanı verməyə borcludur. Yekun tapşırıqların bərpası üçün müddətlər və keçirilmə forması məktəbin tədris planı ilə müəyyən ediləcək.

I-IV siniflərdə və V sinfin birinci semestrində qiymətləndirmənin bütün komponentləri üzrə yalnız inkişafetdirici qiymətləndirmədən istifadə olunacaq. Bununla yanaşı, ibtidai təhsil pilləsində (I-VI siniflər) ev tapşırığı komponenti yalnız inkişafetdirici qiymətləndirmə əsasında qiymətləndiriləcək.

Əgər şagirdin hər hansı fənn üzrə illik qiyməti 5,0-dan aşağıdırsa, məktəb payız imtahanı keçirilməzdən əvvəl ona remediasiya proqramı təklif etməyə borcludur.

Xəstəxanaya yerləşdirilmə səbəbindən təhsildə çətinlik yarandığı hallarda məktəb şagirdin tədrisini və qiymətləndirilməsini remediasiya proqramı və/və ya evdə təhsil imkanından istifadə etməklə həyata keçirməyə borcludur”, - deyə Milli Tədris Planında bildirilib.