Şalva Papuaşvili: “Brüssel Avropa İttifaqının maraqlarına zidd fəaliyyət göstərir”

Gürcüstan parlamentinin sədri Şalva Papuaşvili bildirib ki, Gürcüstanın Avropa, Avropa İttifaqı və Aİ ideyası ilə problemi yoxdur, problem Avropa İttifaqının maraqlarına zidd fəaliyyət göstərən Brüsseldədir.

InterPress.ge xəbər verir ki, Papuaşvilinin sözlərinə görə, Avropa İttifaqı bu gün etimadını itirib və bunun İslandiyada keçirilən referendumun nəticələrində də özünü göstərdiyini bildirib.

“Son dövrlərdə gördüyümüz seçkilər, İslandiyada keçirilən referendum bizim dediklərimizin təsdiqi deyildirmi? İslandiya hərtərəfli şəkildə Avropa İttifaqı ilə bağlı olan ölkədir. Onların Aİ üzvü adlandırılması üçün sadəcə bir formal addım çatmır, inteqrasiya səviyyəsi bu qədər yüksəkdir. Buna baxmayaraq, onlar nəinki üzvlükdən, hətta danışıqların bərpasından da ehtiyat etdilər.

Söhbət ondan gedirdi ki, Avropa İttifaqında balıqçılıqla bağlı ciddi qaydalar mövcuddur və müxalifət deyirdi ki, islandiyalılar Avropa gələcəyini balıqçılığa qurban verdilər.

Avropa İttifaqı İslandiyaya balıqçılıqla bağlı xüsusi istisna qaydalarının tətbiq ediləcəyini və İslandiyanın maraqlarını nəzərə alan ayrıca razılaşmanın olacağını təklif edirdi. Əsas məsələ də budur – Brüssel bu vədi verdi, lakin İslandiya həmin vədə inanmadı.

Problem də məhz budur ki, Brüssel bu gün hamının, o cümlədən gürcü xalqının və İslandiyanın gözündə etimadını itirib. Biz çalışırıq ki, Brüssel öz kursunu dəyişsin.

Brüssel bürokratiyasının indiki tərkibi, əlbəttə ki, Avropa İttifaqının maraqlarına zidd fəaliyyət göstərir. Bunu təkcə mən demirəm, ABŞ administrasiyası da bunu deyir. Avropanın və Avropa İttifaqına namizəd ölkənin nümayəndəsi olaraq bizim məqsədlərimizdən biri də Brüsselin siyasətinin dəyişməsidir.

Əgər onlar bizim Avropa İttifaqının üzvü olmağımızı istəyirlərsə, öz siyasətlərini dəyişməlidirlər. Əks halda, bu mümkün deyil. Xarici siyasəti qarışıq olan və xarici siyasət sahəsində artıq heç kimin hörmət etmədiyi belə bir siyasətə malik Avropa İttifaqının üzvü ola bilmərik.

ABŞ dövlət katibi Kaja Kallasla – Avropa İttifaqının xarici işlər və təhlükəsizlik siyasəti üzrə ali nümayəndəsi ilə heç görüşmür. Yeni administrasiyanın hakimiyyətə gəlməsindən il yarım keçib və ABŞ dövlət katibi bu müddət ərzində bir dəfə də Avropa İttifaqının xarici işlər nazirinin funksiyasını yerinə yetirən şəxslə görüşməyib. Bu, hər şeyi göstərir.

Biz güclü və ədalətli Avropa İttifaqı istəyirik. Lakin bu gün buna mövcud Avropa bürokratiyası mane olur”, - deyə Şalva Papuaşvili bildirib.