İrakli Kobaxidze: Gürcüstanda zorakı etirazçılar dinc nümayişçilər kimi təqdim edilirdi

“Gürcüstanda etirazçılar, o cümlədən zorakılıq törədən nümayişçilər təhrik edilirdi. Çoxsaylı saxtakarlıqlar var idi, zorakı etirazçıları dinc nümayişçilər kimi təqdim edirdilər. Bu, farsdır və biz buna öyrəşmişik. Fransa və Albaniya ilə bağlı belə bir fars nümayiş etdirmədilər. Bunun tamamilə siyasi motivləri var”.

InterPress.ge xəbər verir ki, bunu Gürcüstanın Baş naziri İrakli Kobaxidze Fransa, Albaniya və digər Avropa ölkələrində keçirilən kütləvi etiraz aksiyalarını şərh edərkən bildirib.

Onun sözlərinə görə, Avropa bürokratiyası Avropa ölkələrinin hökumətlərini addımlar atmağa çağırmır, əksinə, nümayişçilərə konkret hərəkətlərdən çəkinməyi tövsiyə edirdi. Kobaxidze bildirib ki, Gürcüstanla bağlı Avropa bürokratiyasının yanaşması fərqli olub.

“İkili standartlar açıq-aşkardır. Həm Fransa, həm də Albaniya ilə bağlı bəyanatlarda Avropa bürokratiyası hökumətləri addımlar atmağa çağırmırdı, əksinə, nümayişçilərə konkret hərəkətlərdən çəkinməyi tövsiyə edirdi. Gürcüstanda isə etirazçılar, o cümlədən zorakı nümayişçilər təhrik edilirdi. Çoxsaylı saxtakarlıqlar var idi, zorakı etirazçıları dinc nümayişçilər kimi təqdim edirdilər. Bu, farsdır və biz buna öyrəşmişik.

Fransa və Albaniya ilə bağlı belə bir fars nümayiş etdirmədilər. Bunun tamamilə siyasi motivləri var. Əsas məsələ ədalət, sağlam yanaşma və düzgün bəyanatların verilməsidir. Biz özümüzlə bağlı bunu görmürük.

Avropa ölkələrinə sülh və əmin-amanlıq arzulayırıq. Avropa xalqları və ölkələri ilə bağlı istəyimiz budur”, – deyə İrakli Kobaxidze bildirib.

Məlumat üçün bildirək ki, Avropanın müxtəlif ölkələrində kütləvi etiraz aksiyaları keçirilir. Aksiyalar Fransada başlayıb və buna təhsil sistemi ilə bağlı məsələlər səbəb olub.

Fransadan sonra İspaniya, Portuqaliya, İtaliya, Belçika və Albaniyada da etirazlar başlayıb. Aksiyaların səbəbləri arasında inflyasiya, yanacağın qiymətinin artması və mənzillərin əlçatmaz olması göstərilir.

Bir sıra ölkələrdə etirazlar nümayişçilərlə polis arasında toqquşmalara çevrilib. Bu səbəbdən bir neçə böyük şəhərdə hətta komendant saatı da elan edilib.