ABŞ səfirliyi və AB-nin Gürcüstandakı nümayəndəliyi bəyanat yayır
"Partiya liderlərinin səylərinə baxmayaraq, yeni seçilmiş Parlamentin ilk iclasından əvvəl geniş razılığın əldə oluna bilməməsinə təəssüf edirik".
InterPress.ge xəbər verir ki, bu barədə ABŞ-ın Gürcüstandakı səfirliyi və AB-nin Gürcüstandakı nümayəndəliyi tərəfindən yayılan bəyanatda bildirilib.
Onlar, bütün tərəfləri razılığa gəlmək imkanlarını diqqətlə düşünməyə çağırırlar.
"Gürcüstanın siyasi liderləri son altı həftə ərzində intensiv siyasi dialoqla məşğul olurdular. Mühüm məsələlər həll olunmamış qalsa da, tərəflər artıq Gürcüstanda keçiriləcək seçkiləri əhəmiyyətli dərəcədə yaxşılaşdıracaq geniş seçki islahatları barədə razılığa gəldilər.
Bütün partiya liderlərinin konstruktiv iştirakını və bu çətin danışıqlarda indiyə qədər qazanılan uğurları yüksək qiymətləndiririk. Dialoq çətin və vacib məsələləri əhatə edirdi. Tərəflər bu məsələlərə ölkənin demokratik gələcəyi qarşısında məsuliyyətlə yanaşdılar. Bu cür açıq və hörmətli mübahisələr Gürcüstanın daha fərqli baxışların və maraqların təmsil olunduğu daha plüralist siyasi mənzərəyə doğru irəliləməsi ilə son dərəcə vacibdir. Ölkənin mənafeyi naminə tərəflərin kəskin şəkildə fərqli mövqelərlə barışa biləcəklərinə inanırıq.
Vasitəçi rolumuz, əsasən Gürcüstanın demokratik gündəmini qurmaq üçün tərəflərin fərqli mövqeləri və həll yollarını müzakirə etmələri üçün tərəfsiz bir forum təmin etməkdən ibarət idi. Partiya liderlərinin səylərinə baxmayaraq yeni seçilmiş parlamentin ilk iclasından əvvəl geniş bir razılığın əldə olunmamasına təəssüf edirik. İndi bütün tərəfləri parlamentin Gürcüstanın demokratiyası, iqtisadiyyatı və təhlükəsizliyinin qorunması və möhkəmləndirilməsində tam və həyati rolunu oynamasına imkan verəcək bir razılaşma əldə etmə imkanlarını diqqətlə nəzərdən keçirməyə çağırırıq. Tərəflərin istəyi və razılığa gəlmək üçün həqiqi bir siyasi iradə varsa, bu səyləri dəstəkləməyə davam etməyə hazırıq",-deyə bildirilib bəyanatda.
