Fransadan deportasiya olunacaq Gürcüstan vətəndaşlarının sayının artacağı gözlənilir

Fransada qeyri-qanuni vəziyyətdə olan 58 Gürcüstan vətəndaşı ölkəyə qaytarılıb.

InterPress.ge xəbər verir ki, sözügedən məlumatı Fransa səfirliyi yayıb.

2023-cü ildə 965 qeyri-qanuni gürcü readmissiya çərçivəsində geri qaytarılıb, 2300 nəfərə isə Gürcüstan hava limanından yola düşmək üçün təyyarəyə minməyə icazə verilməyib. Qeyri-qanuni miqrasiyaya qarşı mübarizə sahəsində Fransa-Gürcüstan əməkdaşlığı 2019-cu ildən gücləndirilib və davam etdirilir.

Qeyd edək ki, Fransa 2013-cü ildə Gürcüstanı təhlükəsiz ölkələr siyahısına daxil edib. 2020-2021-ci illərdən etibarən Gürcüstan vətəndaşlarının Fransa hökumətinə sığınacaq istəməsi xüsusilə artıb. 2020-2021-ci illərdə bu rəqəm 103,4%, 2021-2022-ci illərdə isə 114,3% artıb.

Onu da qeyd edək ki, Gürcüstan Fransaya sığınacaq müraciətlərinə görə Əfqanıstan, Banqladeş və Türkiyədən sonra dördüncü yerdədir. 2023-cü ildə sığınacaq axtaranların sayı azalıb, lakin Gürcüstan hələ də dördüncü yerdədir.

Fransa Gürcüstanla sıx əməkdaşlıq edərək 2024-cü ildə deportasiya olunanların sayını artırmağı planlaşdırır.