Avropa Parlamenti Rusiyada keçiriləcək Prezident seçkilərinə müşahidəçilər göndərməyəcək

Avropa Parlamenti Rusiyada keçiriləcək prezident seçkilərini müşahidə etməyəcək və müvafiq olaraq heç bir Avropa Parlamentinin üzvünə Rusiyaya müşahidəçi qismində getmək hüququ verilməyib.

InterPress.ge xəbər verir ki, bu, Avropa Parlamentinin press-relizində qeyd olunub.

“Avropa Parlamenti bu seçki prosesini müşahidə etməyəcək və buna görə də nə prosesin özü, nə də nəticələri ilə bağlı şərh verməyəcək. Avropa Parlamentinin heç bir üzvünə nə Rusiya Federasiyası ərazisində, nə qanunsuz ilhaq edilmiş Krımda, nə də Ukraynanın Rusiya tərəfindən qanunsuz işğal olunmuş digər ərazilərində Avropa Parlamenti adından bu seçki prosesini müşahidə etmək səlahiyyəti yoxdur”, - deyə bildirilib.

Sənəddə vurğulanır ki, Avropa Parlamentinin hər hansı üzvü bu seçkilərə münasibət bildirmək qərarına gələrsə, onlar bunu öz təşəbbüsü ilə edəcək və “heç bir halda öz bəyanatlarında və ya hərəkətlərində Avropa Parlamentinə istinad etməməlidirlər”.

Xatırladaq ki, Rusiyada prezident seçkiləri martın 15-17-də keçiriləcək. Seçkilərdə Mərkəzi Seçki Komissiyası tərəfindən qeydə alınmış 4 namizəd iştirak edir: Vladimir Putin, Leonid Slutski, Nikolay Xaritonov və Vladislav Davankov.