İki azyaşlı uşaq su dolu çuxura düşərək həyatını itirdi

Batumi şəhərinin "Arzular şəhəri" adlanan ərazisində iki azyaşlı uşaq xəndəyə düşərək həlak olub.

InterPress.ge xəbər verir ki, dörd və beş yaşlı uşaqlar tikinti sahəsindəki su ilə dolu çuxura yıxılıblar. Onları bir neçə saat ərzində axtarsalar da, xilas etmək mümkün olmayıb.

Hadisə ilə bağlı Batumi meriyası da rəsmi açıqlama yayıb:

"Batumi şəhərində Fridona Xalvaşi prospekti 188-in yaxınlığında faciəvi hadisə baş verib. Su ilə dolu xəndəyə iki azyaşlı uşaq düşüb. Təəssüf ki, onları xilas etmək mümkün olmayıb", - deyə meriya bildirib.

"Batumelebi" nəşrinin məlumatına görə, uşaqlar xəstəxanaya çatdırılsa da, orada həyatlarını itiriblər.

Hazırda hadisə ilə bağlı istintaq aparılır.