ABŞ Prezidenti Ukrayna Prezidentini belə tənqid etdi - Trampdan gözlənilməz açıqlama

"Seçkisiz diktator Zelenski tez hərəkət etməlidir, yoxsa Ukrayna yox olacaq."

InterPress.ge xəbər verir ki, bu barədə ABŞ prezidenti Donald Tramp, Truth Social platformasında paylaşdığı yazıda qeyd edib.

"Düşünün, orta səviyyəli bir komediya aktyoru – Volodimir Zelenski, ABŞ-ı 350 milyard dollar xərcləməyə və qazanılması mümkün olmayan bir müharibəyə getməyə inandıra bildi. Bu müharibə heç başlamamalı idi və Zelenski onu ABŞ və "Tramp" olmadan heç vaxt həll edə bilməzdi," – deyə Tramp bildirib.

Onun sözlərinə görə, ABŞ Avropadan 200 milyard dollar çox pul xərcləyib, lakin heç bir geri dönüş əldə etməyib.

"Niyə yuxulu Co Bayden bu məsələdə balans yaratmağı tələb etmədi? Nəticədə bu müharibə Avropa üçün daha vacibdir. Bizim isə gözəl, böyük bir okeanımız var ki, bizi ayırır," – deyə o əlavə edib.

Tramp həmçinin Zelenskini seçki keçirməkdən imtina etdiyinə görə tənqid edib və Ukrayna liderinin reytinqinin aşağı olduğunu vurğulayıb.

"Zelenski etiraf edir ki, biz ona göndərdiyimiz pulun yarısı "yoxa çıxıb". O, seçki keçirməkdən imtina edir, Ukrayna sorğularında çox aşağı reytinqə sahibdir və yeganə bacardığı şey Baydeni manipulyasiya etmək idi. Seçkisiz diktator kimi Zelenski tez hərəkət etməlidir, əks halda Ukrayna mövcud olmayacaq," – deyə Tramp bildirib.

Bununla yanaşı, Tramp Rusiyayla müharibənin bitməsi üçün uğurlu danışıqlar aparıldığını və bu prosesi yalnız onun və onun administrasiyasının həyata keçirə biləcəyini qeyd edib.

"Biz Rusiyayla uğurlu sülh danışıqları aparırıq və hər kəs etiraf edir ki, bu prosesi yalnız Tramp və Tramp administrasiyası bacarar. Bayden heç vaxt cəhd etməyib, Avropa sülh yaratmaqda uğursuz olub və Zelenski, çox güman ki, sadəcə "pul axınının" davam etməsini istəyir," – deyə Tramp vurğulayıb.

O, Ukraynanı sevdiyini, lakin Zelenskinin rəhbərliyi altında ölkənin dağılmağa davam etdiyini və lazımsız insan tələfatının baş verdiyini bildirib.