Ukrayna vətəndaşları partlayıcı maddələrin və narkotiklərin qanunsuz dövriyyəsinə görə ittiham olunur

Gürcüstan Prokurorluğu Ukraynanın iki vətəndaşına partlayıcı maddələrin qanunsuz əldə edilməsi, saxlanması, daşınması, satışı və ölkəyə qaçaqmalçılıq yolu ilə gətirilməsi faktı üzrə ittiham irəli sürüb.

InterPress.ge xəbər verir ki, bu barədə məlumatı qurumun mətbuat xidməti yayıb.

İstintaq Dövlət Təhlükəsizliyi Xidmətinin Kontrterror Mərkəzi tərəfindən aparılıb. Müəyyən olunub ki, 2025-ci il sentyabrın 10-da Ukraynadan çıxan yük avtomobili Rumıniya və Bolqarıstan vasitəsilə Türkiyədən keçərək Gürcüstan sərhədini Sarpi gömrük-keçid məntəqəsindən daxil olub.

Avtomobilin sürücüsü gizli saxlanc yerlərində heksogen tərkibli partlayıcı maddə ölkəyə keçirib və onu Gürcüstanda yaşayan digər Ukrayna vətəndaşına təhvil verərkən hər iki şəxs saxlanılıb.

Bundan əlavə, araşdırma zamanı müəyyən olunub ki, saxlanılanlardan biri öz müvəqqəti mənzilində xüsusilə böyük miqdarda “kokain” saxlayıb. Maddə evə keçirilən axtarış zamanı götürülüb.

Prokurorluğun açıqlamasına görə, təqsirləndirilən şəxslərə CM-in 236-cı maddəsinin 3, 4 və 5-ci hissələri, eləcə də 214-cü maddənin 4-cü hissəsi ilə ittiham irəli sürülüb. Bu maddələr 9 ilədək azadlıqdan məhrumetmə cəzasını nəzərdə tutur. Onlardan birinə əlavə olaraq CM-in 260-cı maddəsinin 3-cü hissəsinin “a” bəndi ilə də ittiham elan edilib ki, bu da 20 ilədək və ya ömürlük həbs cəzası ilə nəticələnə bilər.

Prokurorluq məhkəmədən hər iki şəxs barəsində həbs qətimkan tədbirinin seçilməsini tələb edəcək.