Aİ-nin Gürcüstandakı səfiri: “Dekabrda viza rejiminin dayandırılması mexanizmi ilə bağlı illik hesabat açıqlanacaq”

"Avropa Komissiyası dekabr ayında viza rejiminin dayandırılması mexanizmi ilə bağlı illik hesabat dərc edəcək və bu sənəddə Gürcüstan da yer alacaq."

InterPress.ge xəbər verir ki, bu barədə Avropa İttifaqının Gürcüstandakı səfiri Pavel Herçinski bildirib.

Səfir bu barədə vizasız rejimin mümkün dayandırılması ilə bağlı suala cavab verərkən deyib:

“Bu məsələ yenilənmiş viza rejiminin dayandırılması mexanizminə əsasən müzakirə olunacaq. Gözləyirik ki, ayın sonunadək bu mexanizmlə bağlı razılıq əldə ediləcək. Avropa Komissiyası dekabrda mexanizmin illik hesabatını təqdim edəcək, o cümlədən Gürcüstanla bağlı bölmə də daxil olacaq. Bundan sonra Aİ üzv dövlətləri Gürcüstandakı fundamental hüquqlarla bağlı ciddi geriləmə fonunda hansı addımların atılacağını müzakirə edəcəklər,” – deyə Herçinski vurğulayıb.

Diplomat əlavə edib ki, üzv dövlətlərin mümkün qərarları barədə qabaqcadan fərziyyə irəli sürmək istəmir.