Litva Seymi dezinformasiyaya görə cinayət məsuliyyətinin tətbiqini müzakirə edir
Litva Seymi dezinformasiyanın yayılmasına görə cinayət məsuliyyətinin tətbiq olunmasını nəzərdə tutan qanunvericilik dəyişikliklərini müzakirəyə çıxarıb.
InterPress.ge xəbər verir ki, bu barədə Litva İctimai Yayımçısı məlumat yayıb. Bildirilib ki, Seym dezinformasiya, aqressiv müharibə təbliğatının kriminallaşdırılması və “SIM-ferma” adlanan sistemlərin istifadəsinin qarşısının alınmasını nəzərdə tutan beş qanunvericilik düzəlişinin müzakirəsinə başlayıb.
Qanun layihəsinin müəllifi, konservativ deputat Daiva Ulbinayte bildirib ki, bu qanunvericilik paketi “ölkənin informasiya qalxanının yaradılması istiqamətində atılmış ilk addımdır”.
Layihəyə əsasən, Cinayət Məcəlləsinə düşmən dövlətlərin informasiya fəaliyyətinə, aqressiv müharibənin açıq şəkildə təşviqinə, əsaslandırılmasına və təbliğinə görə hüquqi məsuliyyət nəzərdə tutan dəyişiklik ediləcək. Bu əməllərə görə 5 ilədək azadlıqdan məhrumetmə cəzası tətbiq oluna bilər.
Bununla yanaşı, İnzibati Xətalar Məcəlləsinə əsasən dezinformasiyanın yayılmasına görə 200 avrodan 3 min avroya qədər cərimələr tətbiq ediləcək.
Qanun layihəsində həmçinin avtomatlaşdırılmış “SIM-ferma”ların istifadəsinə görə məsuliyyətin müəyyən edilməsi də nəzərdə tutulur. Bu sistemlər çoxsaylı SIM kartlardan istifadə etməklə zəng və mesajların yönləndirilməsi üçün istifadə olunur və əsasən dezinformasiyanın yayılması məqsədi daşıyır.
“Bu qurğular geniş şəkildə dələduzluq, saxta mesajların yayılması, avtomatlaşdırılmış manipulyasiya və dövlətə qarşı informasiya əməliyyatları üçün istifadə olunur”, – deyə qanunvericilik təşəbbüsünün müəllifi bildirib.
Dəyişikliklər həmçinin jurnalist etikası üzrə müfəttiş xidmətinin səlahiyyətlərinin genişləndirilməsini nəzərdə tutur. Yeni qaydalara əsasən, qurum platformalara təhlükəli məlumatların silinməsi və ya onlara girişin məhdudlaşdırılması ilə bağlı göstəriş verə biləcək.
İnformasiya cəmiyyəti xidmətləri haqqında qanuna ediləcək dəyişikliklər isə sosial şəbəkələr və videoplatformaları dövlət qurumlarının tələbi ilə məlumatları silməyə və ya onlara çıxışı məhdudlaşdırmağa məcbur edəcək.
Qanun layihələrinin təqdimatından sonra 75 deputat onların lehinə səs verib, 7 deputat əleyhinə çıxıb, 13 nəfər isə bitərəf qalıb. Layihələr bundan sonra mədəniyyət, milli təhlükəsizlik və müdafiə, həmçinin hüquq və qanunçuluq komitələri tərəfindən müzakirə olunacaq.
Bundan əlavə, bu həftə Litva Seymində dezinformasiya ilə mübarizə və ölkənin informasiya dayanıqlığının gücləndirilməsi məqsədilə müvəqqəti parlament qrupu da yaradılıb. Eyni zamanda, Mədəniyyət Nazirliyində dezinformasiya və manipulyasiyalarla mübarizə planı hazırlayacaq idarələrarası işçi qrup fəaliyyətə başlayıb.
