Tramp: İranın sızdırdığı şərtlərin yazılı razılaşma ilə heç bir əlaqəsi yoxdur

ABŞ Prezidenti Donald Tramp İranı danışıqlarda qeyri-səmimilikdə ittiham edərək bildirib ki, Tehran tərəfindən mediaya ötürülən məlumatlar yazılı şəkildə razılaşdırılmış şərtləri əks etdirmir.

InterPress.ge xəbər verir ki, Tramp bu barədə sosial şəbəkədə paylaşım edib. ABŞ Prezidenti İranın saxta mediaya təqdim etdiyi şərtlərin həqiqətə uyğun olmadığını və İran rəsmilərinin razılaşmanın əldə olunması ilə bağlı səsləndirdiyi bəyanatların reallıqla heç bir əlaqəsinin olmadığını iddia edib.

"İranın saxta mediaya sızdırdığı şərtlərin yazılı şəkildə razılaşdırılmış şərtlərlə heç bir əlaqəsi yoxdur. Onların söylədikləri, o cümlədən razılaşmanın əldə olunması ilə bağlı zəif və aciz bəyanatları həqiqətlə heç bir əlaqə daşımır.

Onlar çox qeyri-səmimi insanlardır. Onlarla vicdanlı şəkildə danışıqlar aparmaq mümkün deyil. Bu, heyrətamizdir!", – deyə Tramp yazıb.

ABŞ Prezidenti həmçinin bildirib ki, İranın ötən gecə Hörmüz boğazından çıxan Hindistan gəmilərinə qarşı pilotsuz uçuş aparatları ilə həyata keçirməyə çalışdığı hücum cəhdi uğursuz olub.

"Ötən gecə Hörmüz boğazından çıxan Hindistan gəmilərinə qarşı dronlarla həyata keçirilən uğursuz hücum tamamilə qəbuledilməzdir. Yaxşı olar ki, onlar ağıllarını başlarına yığsınlar və bunu tez etsinlər", – deyə Donald Tramp vurğulayıb.