Tbilisidə əmisiqızı Fatimə Kərimovanı qətlə yetirməkdə təqsirləndirilən Emin Əliyev saxlanıldı
Azərbaycan vətəndaşı Emin Əliyev, əmisiqızı Fatimə Kərimovanı Tbilisidə kirayədə qaldıqları mənzildə qətlə yetirməkdə təqsirləndirilərək saxlanılıb.
InterPress.ge xəbər verir ki, bu barədə Gürcüstanın Daxili İşlər Nazirliyi məlumat yayıb.
Qurumun məlumatına görə, təqsirləndirilən şəxs Batumi Beynəlxalq Hava Limanında saxlanılıb.
Nazirliyin bildirdiyinə əsasən, Tbilisi Polis Departamenti və Mərkəzi Kriminal Polis Departamentinin əməkdaşları tərəfindən həyata keçirilən birgə əməliyyat-axtarış və istintaq tədbirləri nəticəsində qətldə təqsirləndirilən şəxs tutulub.
Məlumata görə, saxlanılma əməliyyatı Türkiyə və Azərbaycan hüquq-mühafizə orqanları ilə sıx koordinasiya, eləcə də Gürcüstan polisinin Türkiyədəki attaşesinin birbaşa iştirakı ilə həyata keçirilib.
İstintaqın məlumatına əsasən, 27 iyun tarixində Emin Əliyev Tbilisidə müvəqqəti yaşadıqları mənzildə qohumu Fatimə Kərimovaya həyat üçün təhlükəli xəsarətlər yetirib. Gənc qadın aldığı xəsarətlər nəticəsində hadisə yerində dünyasını dəyişib.
Polis isti izlərlə həyata keçirilən əməliyyat-axtarış tədbirləri nəticəsində şübhəlinin şəxsiyyətini qısa müddətdə müəyyən edib və barəsində axtarış elan edib.
Faktla bağlı Gürcüstan Cinayət Məcəlləsinin 109-cu maddəsi (ağırlaşdırıcı hallarda qəsdən adam öldürmə) ilə istintaq aparılır. Bu maddə 20 ilədək və ya ömürlük azadlıqdan məhrumetmə cəzasını nəzərdə tutur.
