DTX elektrik enerjisinin kütləvi kəsilməsi ilə bağlı təxribat maddəsi ilə istintaqa başladı

Gürcüstan Dövlət Təhlükəsizliyi Xidməti (DTX) iyulun 24 və 25-də ölkə üzrə elektrik enerjisinin qəza səbəbindən dəfələrlə kəsilməsi ilə bağlı təxribat maddəsi üzrə istintaqa başlayıb.

InterPress.ge xəbər verir ki, qurumun məlumatına əsasən, istintaq Gürcüstan Cinayət Məcəlləsinin 318-ci maddəsi ilə aparılır. Həmin maddə Gürcüstanın dövlət maraqlarına təhlükə yaratmaq məqsədilə dövlət müəssisəsinin və ya digər mühüm obyektlərin normal fəaliyyətinə mane olma və ya onların zədələnməsi, yaxud məhv edilməsini nəzərdə tutur.

Bəyanatda qeyd olunub ki, Dövlət Təhlükəsizliyi Xidməti istintaqın gedişi ilə bağlı ictimaiyyəti mərhələli şəkildə məlumatlandıracaq.