Gürcüstanda işsizlik artıb – 2025-ci ilin II rübünün statistika göstəriciləri

2025-ci ilin II rübündə ölkədə işsizlik səviyyəsi ötən ilin eyni dövrü ilə müqayisədə 0,6 faiz bəndi artaraq 14% təşkil edib.

InterPress.ge xəbər verir ki, bu barədə Gürcüstan Milli Statistika Xidmətinin (Sakstat) məlumatında qeyd olunub. 

Rəsmi məlumata əsasən, hesabat dövründə muzdlu işçilərin sayı 4,7 min nəfər (0,5%) artaraq 940,5 min nəfərə çatıb. Eyni zamanda, özünü məşğul edənlərin sayı 29,3 min nəfər (6,5%) azalaraq 422,2 min nəfər olub. Nəticədə işsizlərin ümumi sayı 7,9 min nəfər (3,6%) artaraq 227,6 min nəfərə yüksəlib.

İşçi qüvvəsinin iqtisadi fəallıq göstəricisi ötən ilin analoji dövrü ilə müqayisədə 0,3 faiz bəndi azalaraq 54,1%, məşğulluq səviyyəsi isə 0,6 faiz bəndi azalaraq 46,4% təşkil edib. Bu göstəricilər həm şəhər, həm də kənd yerlərində azalma ilə müşahidə olunub. Şəhərlərdə məşğulluq səviyyəsi 1,4 faiz bəndi azalıb, kənd yerlərində isə 0,5 faiz bəndi artıb.

Məlumata görə, 2025-ci ilin II rübündə muzdla çalışanların məşğullar arasındakı payı 1,6 faiz bəndi artaraq 69%-ə çatıb. İşsizlik səviyyəsi şəhərlərdə 2,1 faiz bəndi artıb, kənd yerlərində isə 1,5 faiz bəndi azalıb.

Hesabatda qeyd olunur ki, ənənəvi olaraq kişilər arasında işsizlik qadınlarla müqayisədə daha yüksəkdir. 2025-ci ilin II rübündə qadınlarda işsizlik ötən ilin eyni dövrünə nisbətən 1,3 faiz bəndi artaraq 12,2%-ə yüksəlib, kişilərdə isə dəyişməyib və 15,9% təşkil edib. İşçi qüvvəsinin iqtisadi fəallığı kişilərdə 66,2%, qadınlarda isə 43,7% olub.

Məşğulluq səviyyəsi ötən ilin eyni dövrü ilə müqayisədə qadınlarda 1,2 faiz bəndi azalıb, kişilərdə isə 0,1 faiz bəndi artıb.