“Gürcüstan Dəmir Yolları” sərnişinlərinə qatar gecikdiyi halda kompensasiya ödənilə bilər

“Gürcüstan Dəmir Yolları”nın sərnişinlərinə qatarın gecikməsi halında kompensasiya almaq imkanı verilə bilər.

InterPress.ge xəbər verir ki, iqtisadiyyat və davamlı inkişaf nazirinin təsdiqlədiyi “Dəmir yolu sərnişinlərinin hüquqlarının müdafiəsi Qaydaları”nda bu barədə müddəalar yer alıb.

Qaydalara əsasən, gecikmə dəmir yolu müəssisəsinin səbəbindən baş verdiyi və sərnişin təyinat məntəqəsinə 60 dəqiqə və ya daha çox gecikmə ilə çatdığı halda, sərnişinin kompensasiya tələb etmək hüququ olacaq.

Sərnişinə ödəniləcək minimum kompensasiya məbləği belə müəyyənləşdirilib:

• 60–120 dəqiqə gecikmə – bilet qiymətinin 25 faizi;

• 120 dəqiqə və daha çox gecikmə – bilet qiymətinin 50 faizi.

Bu halda sərnişin səfər etmək hüququnu da saxlayır.

Qaydalar abonement və mövsümi biletlərə sahib sərnişinlərə də şamil olunur. Belə biletlərin qüvvədə olduğu müddətdə gecikmələrin və ya xidmətin ləğvinin təkrarlanması halında kompensasiya dəmir yolu müəssisəsinin müəyyən etdiyi kompensasiya şərtlərinə əsasən ödənilə bilər.

Kompensasiya sərnişinin ödədiyi biletin ümumi məbləği əsasında hesablanacaq və əlavə komissiya haqqı nəzərə alınmayacaq. İkitərəfli səfər nəzərdə tutulan bilet üzrə kompensasiya gecikmiş səfər hissəsinin dəyərinə uyğun hesablanacaq. Ayrı-ayrı səfər hissələrinin qiyməti biletdə göstərilmədiyi halda isə kompensasiya bilet qiymətinin yarısı həcmində ödəniləcək.

Sərnişinlərin kompensasiya tələblərini vahid formada təqdim etməsi mümkün olacaq. Lakin dəmir yolu müəssisələri sərnişinin həmin formadan istifadə etməməsini kompensasiya tələbinin rədd edilməsi üçün əsas kimi götürə bilməyəcək.

Kompensasiya tələbi gecikmiş və ya ləğv edilmiş reysin başlandığı tarixdən sonrakı gündən etibarən 10 gün ərzində təqdim edilməlidir. Tələb təsdiqləndikdən sonra kompensasiya 30 gün ərzində ödənilməlidir.

Sərnişinin razılığı olduğu halda kompensasiya vauçer və ya dəmir yolu ilə digər uyğun xidmət formasında da təqdim edilə bilər. Lakin sərnişinin tələbi əsasında kompensasiya pul şəklində ödənilməlidir.

Qaydalara əsasən, dəmir yolu müəssisələri kompensasiyanın ödənilməsi üçün 5 lariyə qədər minimum hədd müəyyən edə bilərlər.

Bununla yanaşı, sərnişinə gecikmə barədə bilet alınmazdan əvvəl məlumat verilibsə, kompensasiya almaq hüququ olmayacaq. Həmçinin digər xidmət çərçivəsində səfərin davam etdirilməsi və ya marşrutun dəyişdirilməsi nəticəsində gecikmə 60 dəqiqədən az olarsa, kompensasiya ödənilməyəcək.

Dəmir yolu müəssisəsi bəzi hallarda, o cümlədən əlverişsiz hava şəraiti, təbii fəlakət, epidemiya və digər fövqəladə hallar səbəbindən yaranan gecikmələrə görə kompensasiya ödəməkdən azad edilə bilər. Sərnişinin təqsiri və ya üçüncü şəxslərin fəaliyyəti nəticəsində yaranan və dəmir yolu müəssisəsinin qarşısını almaq imkanında olmadığı gecikmələr də bu kateqoriyaya daxildir.

Eyni zamanda, qaydalara görə, təyinat məntəqəsinə 60 dəqiqə və ya daha çox gecikmə ehtimalı yarandıqda, dəmir yolu müəssisəsi sərnişinə alternativ seçimlər təqdim etməlidir.

Sərnişin belə hallarda:

• səfərin həyata keçirilməmiş hissəsi üzrə bilet pulunun geri qaytarılmasını və ilkin səfər planının yerinə yetirilmədiyi halda istifadə edilmiş hissənin də kompensasiya edilməsini;

• ilk mümkün vaxtda oxşar nəqliyyat şərtləri ilə səfərin davam etdirilməsini və ya marşrutun dəyişdirilməsini;

• özünə uyğun vaxtda səfərin davam etdirilməsini və ya marşrutun dəyişdirilməsini seçə bilər.

Əgər dəmir yolu ilə səfərin ağlabatan müddətdə davam etdirilməsi mümkün olmazsa, daşıyıcı sərnişinə alternativ yerüstü nəqliyyat xidməti təklif etməlidir.

Sənəddə həmçinin baqajın itirilməsi, zədələnməsi və gecikmə ilə təhvil verilməsi hallarında kompensasiya şərtləri də müəyyənləşdirilib.