Sosial şəbəkədə şantaj edən şəxs saxlanıldı
Gürcüstan Prokurorluğunun əməkdaşları şəxsi həyata aid gizli məlumatların qanunsuz əldə edilməsi, saxlanması və istifadəsi faktı üzrə bir nəfəri saxlayıblar.
InterPress.ge xəbər verir ki, bu barədə məlumatı Prokurorluq yayıb.
Araşdırma Tbilisi Prokurorluğunun şəxsi həyatın toxunulmazlığının qorunması üzrə idarəsi tərəfindən aparılıb. İstintaqla müəyyən edilib ki, təqsirləndirilən şəxs Instagram sosial şəbəkəsi vasitəsilə müxtəlif şəxslərlə yazışmalar aparıb. Yazışmalar zamanı o, həmin şəxslərin göndərdiyi intim xarakterli foto və video materialları onların icazəsi olmadan gizli şəkildə saxlayıb.
İttihama görə, o, əldə etdiyi bu materiallardan birini, münasibətini davam etdirmək məqsədilə, bir azyaşlı zərərçəkəni şantaj etmək üçün istifadə edib — yəni qanunsuz yolla əldə etdiyi şəxsi materialları yaymaqla hədələyib.
Prokurorluğun məlumatına əsasən, istintaq çərçivəsində qısa müddətdə bir sıra əməliyyat-istintaq tədbirləri həyata keçirilib:
zərərçəkənlər dindirilib,
təqsirləndirilən şəxsin evində və üzərində axtarış aparılıb,
elektron məlumat daşıyıcıları götürülüb,
müvafiq məlumatlar toplanaraq informasiya-texnoloji ekspertiza aparılıb.
Axtarış zamanı onun mobil telefonunda onlarla şəxsin intim məzmunlu foto və video materialları aşkarlanıb. Hazırda zərərçəkmiş şəxslərin identifikasiyası və dindirilməsi prosesi davam edir.
Prokurorluğun məlumatına görə, təqsirləndirilən şəxs məhkəmə qərarı ilə 7 oktyabrda saxlanılıb. O, Gürcüstan Cinayət Məcəlləsinin 157¹-ci maddəsinin birinci bəndi ilə – şəxsi həyatın gizliliyini pozmaq, qanunsuz əldəetmə, saxlama və yayma ittihamı ilə məsuliyyətə cəlb edilib.
Bu maddə ilə 7 ilədək azadlıqdan məhrumetmə cəzası nəzərdə tutulur. Prokurorluq təqsirləndirilən şəxs barəsində həbs qətimkan tədbirinin seçilməsi üçün məhkəməyə müraciət edəcəyini bildirib.
