Şalva Papuaşvili: Qanuna tabe olmayan QHT-lər xarici maliyyə ilə qanun pozuntusuna təşviq olunurlar
Gürcüstan parlamentinin sədri Şalva Papuaşvili şəffaflıq reyestrində qeydiyyatdan keçməyən qeyri-hökumət təşkilatları (QHT) barədə danışıb və onların qanuna əməl etmədiklərini bildirib.
InterPress.ge xəbər verir ki, Papuaşvili bu barədə Avropa İnsan Hüquqları Məhkəməsinin beş Gürcüstan QHT-sinin bank hesablarının dondurulması ilə bağlı şikayəti kommunikasiya etməsi və işin mahiyyəti üzrə baxılmasına başlamasına münasibət bildirərkən deyib.
Onun sözlərinə görə, həmin təşkilatların məhkəməyə müraciət etmək hüququ var, lakin onlar məhkəmələrin qərarlarına da hörmət etməlidirlər.
“Onların məhkəməyə müraciət etmək hüququ var. Bildiyiniz kimi, bir neçə təşkilat Konstitusiya Məhkəməsinə, daha sonra isə Strasburq Məhkəməsinə müraciət edib. Lakin hüquqi yolla gedirsinizsə, məhkəmələrin prosedurlarına və qərarlarına da əməl etməlisiniz. Konstitusiya Məhkəməsi qanunun icrasının dayandırılması ilə bağlı tələbi rədd etdi. Daha sonra Strasburq Məhkəməsinə müraciət etdilər, lakin o da qanunun qüvvəsini dayandırmadı. Əgər bu təşkilatlar Strasburq Məhkəməsinə və ya Konstitusiya Məhkəməsinə hörmət etdiklərini iddia edirlərsə, onların qərarlarına da tabe olmalıdırlar.
Nə Strasburq Məhkəməsi, nə də Gürcüstan Konstitusiya Məhkəməsi işə baxıldığı müddətdə qanunun icrasını dayandırmayıb. Bu isə o deməkdir ki, qanuna əməl etməlidirlər. Lakin biz görürük ki, bu təşkilatlar qanun pozucularıdır. Onlar nə qanunun aliliyinə, nə demokratiyaya, nə də hüquq qaydalarına hörmət edirlər. Əsas nəticə budur ki, söhbət xarici maliyyə hesabına qanun pozuntusuna təşviq olunan qurumlardan gedir.
Biz bilirik ki, bu təşkilatlar “Şəffaflıq Reyestri”ndə qeydiyyatdan keçməməklə qanunu pozurlar. Onların donorları isə buna görə maliyyəni dayandırmaq əvəzinə, əksinə, daha çox vəsait ayırırlar və bununla Gürcüstanda qanun pozuntusunu təşviq edirlər. Bu da donorların davranışı baxımından ayrıca narahatedici faktdır”, – deyə Şalva Papuaşvili bildirib.
Qeyd edək ki, Avropa İnsan Hüquqları Məhkəməsi beş Gürcüstan qeyri-hökumət təşkilatının – Sosial Ədalət Mərkəzi, Vətəndaş Cəmiyyəti Fondu, Ədalətli Seçkilər və Demokratiya üzrə Beynəlxalq Cəmiyyət (ISFED), İnformasiya Azadlığının İnkişafı İnstitutu (IDFI) və Sapari təşkilatının bank hesablarının dondurulması ilə bağlı şikayətini kommunikasiya edib və bununla da işin mahiyyəti üzrə baxılmasına başlayıb.
QHT-lərin məlumatına görə, Avropa Məhkəməsi bu iddiaya mühüm əhəmiyyət daşıyan iş statusu verib. Bu isə o deməkdir ki, məhkəmə ilkin qiymətləndirməyə əsasən hesab edir ki, iş onun gələcək presedent təcrübəsinə, milli qanunvericiliyə və daha geniş hüquqi və ictimai məsələlərə mühüm təsir göstərə bilər.
