Parlament etiraz aksiyaları ilə bağlı qanunvericiliyin əvvəlki vəziyyətinə qaytarılmasını müzakirə edəcək

Gürcüstan parlamentinin Hüquq Məsələləri Komitəsi sentyabrın 14-də keçiriləcək iclasda “Gürcüstan naminə” fraksiyasının toplantı və nümayişlərlə bağlı qanunvericilik təşəbbüsünü müzakirə edəcək.

InterPress.ge xəbər verir ki, müxalif fraksiyanın hazırladığı qanun layihəsinin məqsədi toplantı və nümayişlərlə bağlı 2024-cü ilə qədər qüvvədə olan hüquqi status-kvonun bərpa edilməsidir.

“Gürcüstan naminə” fraksiyasının qiymətləndirməsinə əsasən, hazırda qüvvədə olan repressiv normalar Konstitusiya ilə təmin edilən toplantı və nümayiş azadlığı fundamental hüququnu qeyri-mütənasib şəkildə məhdudlaşdırır. Bununla yanaşı, hüquq-mühafizə orqanlarına həddindən artıq geniş və qeyri-müəyyən səlahiyyətlər verilib ki, bu da istənilən dinc nümayişçini hüquqi baxımdan müdafiəsiz vəziyyətə salır.

Parlamentə təqdim edilən qanun layihəsinə əsasən, toplantılarla bağlı inzibati funksiyaların yenidən Daxili İşlər Nazirliyindən bələdiyyələrə verilməsi nəzərdə tutulur.

Təşəbbüsə əsasən, toplantı insanların hərəkət etdiyi ərazidə, yəni səkidə keçirilirsə və nəqliyyat yolunun bağlanmasına səbəb olmursa, əvvəlcədən xəbərdarlıq etmək öhdəliyi ləğv edilir.

Həmçinin Daxili İşlər Nazirliyinin toplantının alternativ keçiriləcəyi yer, vaxt və ya hərəkət marşrutu ilə bağlı məcburi göstərişlər vermək səlahiyyətinin ləğvi nəzərdə tutulur. Dövlət qurumlarının yalnız məcburi olmayan “tövsiyə” vermək hüququ saxlanılır.

Layihə, həmçinin, Gürcüstanın Cinayət Məcəlləsində nəzərdə tutulan cinayət predmetinə çevrilməyən, mülki dövriyyədə olan hər hansı əşyanın toplantı zamanı daşınmasına qoyulan qadağanı da ləğv edir.

Bundan əlavə, toplantı iştirakçılarına kritik əhəmiyyətli obyektlərin maneəsiz fəaliyyətini təmin etmək məqsədilə 20 metrlik zonaya riayət etməklə, etiraz formasını müstəqil şəkildə müəyyən etmək hüququ verilir.

“Toplantı zamanı mülki dövriyyədə olan hər hansı əşyanın qadağan edilməsi hüquqi baxımdan əsassızdır. Çünki əşyadan istifadə etməklə törədilə biləcək istənilən cinayət xarakterli əməl artıq Cinayət Məcəlləsi ilə tənzimlənir. Buna görə də qanun əşyanın özünün saxlanmasına deyil, yalnız konkret qanunsuz hərəkətə reaksiya verməlidir”, - deyə layihənin təşəbbüskarları bildiriblər.