Səfərbərlik zamanı Müdafiə Qüvvələrinin tərkibinə yeni agentlik daxil ediləcək

Gürcüstanda hərbi vəziyyət elan olunduğu halda Müdafiə Qüvvələrinin tərkibinə Hərbi Çağırış və Rekrutlaşdırma üzrə Milli Agentlik əlavə olunacaq.

InterPress.ge xəbər verir ki, bu, parlamentə təqdim olunan “Müdafiə Məcəlləsi”nə dəyişikliklər paketində nəzərdə tutulur.

Yeni Müdafiə Məcəlləsinin qüvvəyə minməsindən sonra yaradılmış Hərbi Çağırış və Rekrutlaşdırma üzrə Milli Agentliyin əsas funksiyası vətəndaşların hərbi xidmətə çağırılması və Müdafiə Qüvvələrinin ehtiyatının qeydiyyatının aparılmasıdır.

 

Müdafiə Nazirliyinin məlumatına görə, agentliyin strukturu bələdiyyələr üzrə xidmətlərdən ibarətdir və onun müharibə vəziyyətində istifadə oluna biləcək əhəmiyyətli infrastruktur bazası mövcuddur.

“Bu səbəbdən, sülh dövründə agentlik ilə Müdafiə Qüvvələri birgə təlimlər, məşqlər və tədris proqramları keçirməli, operativ planlar, standart əməliyyat prosedurları və müvafiq hüquqi aktların hazırlanması təmin edilməlidir”, – deyə Müdafiə Nazirliyi bildirir.

Qanunvericilik paketi aşağıdakı qanunlara dəyişiklikləri nəzərdə tutur: “Müdafiə Məcəlləsi”, “Qeyri-hərbi, alternativ əmək xidməti haqqında” qanun, “İctimai xidmət haqqında” qanun, “Gürcüstan vətəndaşlarının ölkədən çıxışı və ölkəyə daxil olması qaydaları haqqında” qanun və “Administrativ Xətalar Məcəlləsi”.

Qanun layihələri paketi Müdafiə Nazirliyi tərəfindən hazırlanıb.